‎O, mga makata

‎O, MGA MAKATA

‎

‎O, mga makata, ako'y nagpupugay

‎sa inyo't sa tula ninyong kayhuhusay!

‎Katha'y tila bigas na mula sa palay,

‎na kung isasaing, kaysarap na tunay!

Kapara ng kanin, tula'y iniin-in

upang di magtutong ang niluto natin.

Minsan hihigop pa ng am sa sinaing.

Nalaglag na mumo, minsa'y pupulutin.

Ating mga tula'y parang pansit luglog

na sa mambabasa sana'y makabusog.

Sakaling masaktan o kaya'y mauntog,

paumanhin, sana bunga'y mapipintog.

‎Bilang manunula, sabi kong malimit:

‎ang salitang "pero'y" di ko ginagamit

pagkat may "datapwat", " ngunit" at "subalit".

Sa sariling wika tayo mangunyapit!

‎Sa tula ko'y walang Superman o Darna

‎kundi sambayanan, walang isang bida!

‎Kolektibong kilos, bayani ang masa!

‎Nagtagumpay pagkat sila'y sama-sama!

Kaya, O, makata, padayon! Padayon!

Angkin nating diwa ay di makakahon!

Diwa'y naglalakbay at naglilimayon

sa mundo kung saan tayo paroroon!

‎

‎- gregoriovbituinjr.

‎09.09.2026

‎

‎* litrato mula sa larong Word Master

Batas sa ating bansa

BATAS SA ATING BANSA

ginagawa / ng agila'y / batas para / sa tilapya

lawin nama'y / nagsabatas / ng pambiya't / labahita

batas niyong / uwak, para / sa kanduli't / hasa-hasa 

nililikha / ng kuwago'y / batas para / sa pugita

bakit gayon / ang nangyari / ay di naman / magkauri

kapara rin / ng Kongresong / dinastiya / yaong hari

pawang batas / ay patungkol / sa pribadong / pag-aari

silang tingin / sa obrero't / maralita / ay kadiri

ang serbisyo / ay nagosyo / nitong ibong / malalakas

kaya anong / aasahan / nitong isda / kundi dahas

mga isda / yaong dapat / na gumawa / nitong batas

nang tiyaking / batas para / sa isda'y di / butas-butas

pag di tayo / namumulat, / dinastiyang / pulitikal

ang sa masa't / dukha'y lagi / nang sisiil / at sasakal

- gregoriovbituinjr.

09.08.2026

Depinisyon nila ng progreso

DEPINISYON NILA NG PROGRESO

sinira ang kalikasan

minina ang kabundukan

kinalbo ang kagubatan

para raw sa kaunlaran

trato sa puno ay troso

kaya gubat na'y kinalbo

una'y negosyo, di tao

iyan umano'y progreso

nilagyan ng paliparan

iyan daw ang kaunlaran

ang nangyari'y palubugan

lubog sa baha ang bayan

ano nga ba ang progreso

kung di kasama ang tao

kung serbisyo na'y negosyo

kung sinira na ang mundo

- gregoriovbituinjr.

09.05.2026

Pagninilay

PAGNINILAY

‎

‎di ko hilig iyang makipagdigmaan

‎maliban kung sa chess makipagtagisan

‎ng estratehiya at mga taktika 

‎at di sa giyerang kayraming biktima

‎

mabuti't natuto akong manindigan

turo ng magulang, tama'y ipaglaban!

tanong sa sarili'y mga nakikita

laksa-laksa'y bakit kawalang hustisya?

‎

‎bakit may mahirap? bakit may mayaman?

‎sa kaibutura'y laging katanungan

‎bakit nagdarahop silang magsasaka?

‎gayong buong bansa'y pinakain nila!

‎

bakit manggagawa'y aliping sahuran?

gayong nililikha'y yaman ng lipunan!

hirap din ang vendor at namamasada

bigas na'y kaymahal, pati gasolina!

sistemang bulok nga'y sinirang tuluyan

itong kalikasang pinagkakitaan

bundok, gubat, dagat, lupa'y minimina

para sa negosyo at malaking kita

‎

gawin ang marapat, huwag mang-iiwan

dapat masang api'y matutong lumaban

‎kaya nangalsada ako't nakiisa

‎laban sa pag-api't pagsasamantala!

‎

‎- gregoriovbituinjr.

‎09.04.2026

Imbes Pero ay Ngunit, Datapwat at Subalit

‎IMBES PERO AY NGUNIT, DATAPWAT AT SUBALIT

‎

‎Aniya: Pero nadulas siya.

‎Ikako: Ngunit nadulas siya.

‎

‎Aniya: Pero ako'y lumaban.

‎Ikako: Ngunit ako'y lumaban.

‎

‎Aniya: Pero nakibaka rin.

‎Ikako: Ngunit nakibaka rin.

‎

‎Aniya pa: Pero ako ito.

‎Ikako: Subalit ako ito.

Sabi niya: Pero maaari.

Aniko: Datapwat maaari.

‎

‎Imbes Pero ang aking ginamit,

ay Datapwat, Ngunit at Subalit.

‎

‎Ang Pero ay wikang Kastilaloy,

subalit may katumbas sa Pinoy.

‎

‎Kung may sarili tayong salita,

‎gamitin natin nang di mawala.

‎

‎- gregoriovbituinjr.

‎09.03.2026

Bahâ

BAHÂ

Sanay na nga ba tayo sa bahâ

kaya wala tayong ginagawâ?

Sanhi rin iyang trapong kuhilâ

na dinistrungka'y kaban ng bansâ.

Sa baha, huwag tayong masanay!

Pagsingil ay gawin nating pakay.

Alalahaning bahay at buhay

ang ipinagtatanggol nating tunay!

Ginawang proyekto'y paliparan

ngunit ang nangyari'y palubugan.

Nilubog sa baha ang lansangan

pati na aming mga tahanan!

Singilin natin lahat ng sangkot

sa isyung flood control na'y managot!

Tiyakin nating may malalagot

at dito'y walang makalulusot!

Mga lingkodbayang palamunin

ng manggagawa'y dapat alisin!

Lahat ng maysala'y panagutin

at mga nagrarali ay dinggin!

- gregoriovbituinjr.

09.03.2026

* litrato mula sa google

Sa sama-samang pagkilos

SA SAMA-SAMANG PAGKILOS

pinaniwala

tayo sa isang

tagapagligtas

imbes na tayo'y

sa sama-samang

kilos umasa

ganyan ang diwa

ng isang Batman

o ng Superman

paniwala ko'y 

walang bayani

tulad ni Darna

kundi ang bida

ay taumbayan,

ang sambayanan

sa Unang Alsa

ng mamamayan

doon sa Edsa

sa sama-samang

kilos ng masa

nagawa nila

ang mapatalsik

ang diktadura!

kaya ng masa!

isang aral na

ating patnubay

tungong tagumpay

dagdag ko lamang

uring obrero

at magsasaka

kung sama-sama

silang kikilos

ang magbabago

nitong sistemang

mapang-api na'y

bulok pa't bugok

- gregoriovbituinjr.

09.01.2026