Pangarap

PANGARAP

ah, napakatayog ng pangarap

nakatingala sa alapaap

kahit buhay ay aandap-andap

ay patuloy pa ring nagsisikap

nakatira man sa gilid-gilid

sa danas na pagkadukha'y manhid

basta't nabubuhay nang matuwid

mararating din ang himpapawid

nangarap ngunit di pansarili

kundi pag-asenso ng marami

sa sistemang bulok masasabi

palitan na't huwag ikandili

ang pangarap niyang itinakda

kasama'y organisadong dukha

pati na ang uring manggagawa

lipunang makatao'y malikha

- gregoriovbituinjr.

01.18.2022

Pula't dilaw

PULA'T DILAW

pinagninilayan ko pa rin

ang mga palad nating angkin

paano kaya tutukuyin

sinong mga lumalambitin

sa baging ng mga haragan

kasama ang trapo't gahaman

anang awit, pula't dilaw man

ay di tunay na magkalaban

pangmayaman daw ang hustisya

na nabibili ng sampera

kung ganyang bulok ang sistema

aba'y kawawa nga ang masa

kung sistemang bulok ang gawa

nitong mga trapong kuhila

wala na ba tayong kawala

sa pagsasamantalang sadya

pula't dilaw ba pag naupo

kabulukan ba'y maglalaho

magtutulong ba pag nagtagpo

o sa malaon ay guguho

sistema pa rin ay baguhin

ito pa rin ang pangarapin

ang masa'y ating pakilusin

tungo sa bayang asam natin

- gregoriovbituinjr.

01.16.2022

Kuyom ang kaliwa kong kamao

KUYOM ANG KALIWA KONG KAMAO

kuyom ang kaliwa kong kamao

hangga't wala pa ring pagbabago

hangga't api ang dukha't obrero

at nariyan ang kapitalismo

na sistemang mapagsamantala

sa lakas ng karaniwang masa

hangga't naghahari ang burgesya

at trapong sakim at palamara

ramdam ang sa lupa'y alimuom

hangga't manggagawa't dukha'y gutom

ibig sabihin, sa simpleng lagom

manananatiling kamao'y kuyom

itaas ang kamaong kaliwa

bilang simbolo't kaisang diwa

ng bawat dalita't manggagawa

sa pakikibaka'y laging handa

- gregoriovbituinjr.

01.02.2022

* drawing mula sa google

Pag-asa

PAG-ASA

umaasa pa ba tayong maglilingkod ng tapat

sa sambayanan ang mga trapong burgis at bundat

na upang mahalal, sa masa'y sasayaw, kikindat

habang korupsyong gawa nila'y tinatagong sukat

umaasa pa ba tayong maglilingkod na tunay

sa bayan yaong mga trapong kunwa'y mapagbigay

na pag naupo sa pwesto'y di ka na mapalagay

dahil limot na nila ang mga pangakong taglay

o lider-obrero ang ipantapat sa kanila

na ang dala'y pag-asa't pagbabago ng sistema

may prinsipyong angkin at tagapaglingkod ng masa

lider ng paggawang lalabanan ang dinastiya

hahayaan bang bulok na sistema'y manatili

at muling manalo yaong burgesya't naghahari

saan tayo tataya kung tumakbo na'y kauri

iwaksi na ang trapo, manggagawa'y ipagwagi

- gregoriovbituinjr.

01.02.2022

#manggagawanaman

#laborpower2022

Mensahe sa payong

MENSAHE SA PAYONG

napakainit ng panahon, dama'y alinsangan

sa isang mapagpalayang pagkilos sa Diliman

nang matanaw ko ang nakapayong na mga manang

kayganda ng tatak sa payong at nilitratuhan

panawagan iyong sa aking puso'y ibinulong

nang sa rali't mainit na semento'y nakatuntong

sa tumitinding klima'y saan ba tayo hahantong

na kung di malutas, danasin ay kutya't linggatong

Araw ng Karapatang Pantao noong magrali

habang mga lider-masa'y nagbigay ng mensahe

na huwag ipanalo ang mga tusong buwitre

at buwagin na ang mga political dynasty

gayunman, mensahe sa payong ang agad nakita

ngayon, nanalasang Odette ay nararamdaman pa

ng mga tao't maraming lugar na sinalanta

anong tindi bagamat di sintindi ng Yolanda

mensahe yaon nang buhay ay di basta mapatid

upang tao'y di masadlak sa kumunoy na hatid

mahalagang mensaheng marapat nating mabatid

upang sa pusikit na gabi'y di tayo mabulid

- gregoriovbituinjr.

12.31.2021

* litratong kuha ng makatang gala sa rali noong 12.10.2021, Pandaigdigang Araw ng Karapatang Pantao

* nakatatak sa payong ay "Climate Justice Now" na nilagdaan ng APMDD (Asian People's Movement on Debt and Development)

Panawagan

PANAWAGAN

napadaan lang ako noon sa U.P. Diliman

nang makita yaong nakasulat na panawagan

"Contractual, Gawing Regular", aba'y marapat naman

lalo na't islogang makatao't makatarungan

panawagan nilang ito'y sadyang napapanahon

anuman ang kanilang unyon o organisasyon

kabaong sa manggagawa ang kontraktwalisasyon

kapitalistang pandaraya ang iskemang iyon

kaya nag-selfie ako sa islogang nakasulat

bilang pakikiisa sa manggagawa, sa lahat

ng nakikibaka, lalo sa mga nagsasalat

sa mga obrero'y taas-noong pasasalamat

O, mga manggagawang kontraktwal, magkapitbisig

manggagawang regular ay kakampi ninyo't kabig 

kayong iisang uri'y magturingang magkapatid

iskemang kontraktwalisasyon nga'y dapat mapatid

- gregoriovbituinjr.

12.29.2021

Kapit

KAPIT

kapitbisig, kapitpuso, kapitdiwa, kapit lang

sa pagkilos para sa bayan ay huwag magkulang

kapamilya, kapatid, kauri'y ipagsanggalang

sa mga kapit tuko sa pwesto'y huwag palinlang

maraming kapit sa patalim upang makaraos

upang sa gatas ng sintang anak ay may panggastos

upang kahirapan ay bakasakaling matapos

umaasang di na sila mabuhay nang hikahos

ang kapitalismo'y sistemang mapagsamantala

sa tao't sa kalikasan, baguhin ang sistema

pinopondohan ang mapanira sa mundo't klima

tulad ng plastik, fossil fuel, coal plants, at kapara

kumapit sa wasto, iwaksi ang anumang mali

kumapit sa pag-asa, prinsipyong tangan at mithi

kapit lang, mga kapuso, kapatid, at kauri

magkapitbisig tayo't itaboy ang mga imbi

sa tagdan ng hagdanan ay maaaring kumapit

kung ayaw mahulog, matumba, o kaya'y mabingit

basta kumapit sa pag-asa, huwag palalait

sa sinuman, mahalaga pag-asa'y laging bitbit

kapit lang, huwag patangay sa problemang nariyan

kundi asahang iyan ay mareresolba naman

kongkretong pagsusuri sa kongkretong kalagayan

at maaapuhap din ang ganap na kalutasan

- gregoriovbituinjr.

11.20.2021