Sa Araw ng Kababaihan

SA ARAW NG KABABAIHAN

galing tayo sa sinapupunan

ng ating ina, kababaihan

kaya sila'y ating alagaan

hanggang sa kanilang katandaan

pagmasdan mo si lola't tiyahin

di ba't kahawig ng ina natin?

sila'y dapat na pakamahalin

at pagpapabaya'y huwag gawin

ibigin mo ang iyong asawa

niluwal ay anak n'yong dalawa

pangalagaan sila tuwina

tumanda man, kayo'y magkasama

pangalagaan mo ang kapatid

mong mga babae nang mabatid

na proteksyon ang mensaheng hatid

nang sa paligid ay di malingid

huwag nating hayaang mabastos

ang mga babae't makaraos

Safety Spaces Act, dapat talos

pati VAWC Act, alaming lubos

mga babae, dakila, ina

Tandang Sora, Oriang, Lorena

kababaihan, mag-organisa

baguhin ang bulok na sistema

ngayong Araw ng Kababaihan

kayo po'y pinasasalamatan

kayong kalahati ng lipunan

ng sambayanan, ng daigdigan

mabuhay kayong mga babae

kina Lola, Inay, Tita, Ate

taos-pusong pasalamat, ale

kung wala kayo ay wala kami

- gregoriovbituinjr.

03.08.2022

Dahon

DAHON

"Tayo'y Mga Dahon Lamang," anang awit ng ASIN

dahon sa matatag na punong kinapitan natin

pakinggan mo ang awit, talinghaga'y anong lalim

subalit mauunawaan din ng tulad natin

nakakapit sa sanga'y matibay kahit maginaw

ang gabing ang mga kuliglig ay pumapalahaw

ang bitaminang pampalakas ay sinag ng araw

dahon tayong pag nalagas sa puno'y maninilaw

tayo'y dahon ng punong matatag at nasa lupa

di tulad ng elitistang mapangmata sa dukha

tayo'y karaniwang taong nabuhay sa paggawa

ang matatag na puno'y daigdig, o buong bansa

dahong di parehas ang tubo, iba-ibang uri

may mapagsamantala sa lipunan, naghahari

may laksa-laksang naghihirap at kumain dili

may nabubuhay sa lakas-paggawa, anluwagi

kaya kami'y nangangarap ng pantay na lipunan

na sistema'y di nakakasira ng kalikasan

na hustisya'y di para sa mayaman o iilan

sa yaman ng lipunan, dapat lahat makinabang

oo, tayo'y dahon lamang sa munti nating mundo

ngunit dapat karapatang pantao'y irespeto

hustisyang panlipunan ay pairaling totoo

at itayo na natin ang lipunang makatao

- gregoriovbituinjr.

03.07.2022

Sa Sitio Nagpatong

SA SITIO NAGPATONG

mga magsasaka / ng Sitio Nagpatong

yaong pinuntahan / sa'mi'y sumalubong

laking kagalakan / ang magkita roon

tungkol sa problemang / palupa ang layon

maraming salamat / at kami'y tinanggap

sa munting bulwagan / ng kapwa mahirap

mga lider doon / ay nakipag-usap

upang suliranin / ay aming magagap

anang tagaroon, / bawal ang bisita

kaya problema rin / yaong mga gwardya

mabuti na lamang / ay nagkakaisa

yaong nakausap / naming magsasaka

pinakilala rin / ating kandidato

ang lider-obrero / sa pagkapangulo

ng bansa, para sa / karapatan ninyo

para may kasangga / sa paggogobyerno

mahalagang tunay / yaong talakayan

problema sa lupang / dapat matugunan

lider pa'y kasama / pa sa pagawaan

noon ng ating Ka / Leody de Guzman

- gregoriovbituinjr.

03.07.2022

* nagtungo rito minsan ang pamunuan ng KPML

* litratong kuha ng makatang gala sa nasabing pamayanan

Nagbabagong klima

NAGBABAGONG KLIMA

nakakabagabag na sa tao

ang klimang nagpapabago-bago

tumitindi ang danas na bagyo

na sa madla'y nakakaapekto

mga nasalanta'y nagtitiis

sa panahong nagbabagong-hugis

kaya sigaw ng tao'y di mintis

sa panawagan ng Climate Justice

at sa pandaigdigang usapin

climate emergency'y talakay din

pag-iinit ng mundo'y isipin

1.5 degree'y huwag abutin

sa mukha ng nasalanta'y bakas

ang sigwang kanilang dinaranas

Climate Justice ang sa puso'y atas

para sa mundo, bayan, at bukas

- gregoriovbituinjr.

03.06.2022

Walden kina Baby Marcos at Baby Duterte

WALDEN KINA BABY MARCOS AT BABY DUTERTE

tinawag ni Walden Bello sa paraang masiste

ang mga umano'y takot dumalo sa debate

binanggit sina Baby Marcos at Baby Duterte

na magtutuloy sa neoliberal na diskarte

una nilang debate sa pagka-Bise Pangulo

"Sara is a coward" yaong banat ni Walden Bello

pagkat wala sa debate si Sara, di dumalo

kaya natawag pa niyang Baby Duterte ito

kaytindi ng dating sa madla ng kanyang tinuran

nakayanig sa masa ang gayong katotohanan

mga trapo't dinastiya'y kanya pang inupakan

nadama natin ang tapat niyang paninindigan

si Walden Bello, kandidato ng dukha't paggawa

propesor, kritiko, maalam sa maraming paksa

na may samutsaring librong pawang kanyang inakda

at nararapat maging Bise Pangulo ng bansa

- gregoriovbituinjr.

03.06.2022

* litratong kuha ng makatang gala sa isang forum

Atin 'to

ATIN 'TO

sa isang traysikel nakasabit ang poster nila

sana maraming traysikel na ito'y dala-dala

habang poster ng trapong kandidato'y naglipana

kita agad sinong wala-wala, sinong may pera

paisa-isa man, ito ang ating kandidato

inilalaban ang isyu ng karaniwang tao

Ka Leody de Guzman para sa pagkapangulo

sa ikalawang pangulo naman si Walden Bello

si Ka Leody, may prinsipyo, lider-manggagawa

matagal nang nakikibaka, sosyalistang diwa

na pagkakapantay sa lipunan yaong adhika

salot na kontraktwalisasyon, tatanggaling sadya

si propesor Ka Walden Bello ay talagang atin

magaling sa kasaysayan, libro niya'y basahin

Marcos-Duterte Axis of Evil, kakalabanin

Baby Marcos at Baby Duterte'y dedebatihin

para pagka-Senador, Attorney Luke Espiritu

makakalikasang kandidato, Roy Cabonegro

batikang environmentalist, David D'Angelo

tayo'y magsama-sama upang sila'y ipanalo

ang poster nila sa isang traysikel nakasabit

ikampanya sa masa, sila'y marapat mabitbit

ipakitang sa bulok na sistema'y may kapalit

Bagong Ekonomya, Bagong Pulitika ang giit

- gregoriovbituinjr.

03.05.2022

Tarp na tela

TARP NA TELA

dalawang taal na taga-Pasig

na tangan ang tarpolin na tela

nagsalita sila'y ating dinig

nang midya'y kinapanayam sila

na tinanong ukol sa tarpoling

makakalikasan, ano iyon

di na plastik ang ginamit nila

na parapernalyang pang-eleksyon

kayganda ng katwirang matuwid

kandidato'y makakalikasan

dito pa lang, may mensaheng hatid

kalikasan ay pangalagaan

paninindigan ng kandidato

sa tumitindi nang bagyo't klima

paninindigang para sa mundo

prinsipyadong tindig, makamasa

"Climate Justice Now!" ang panawagan

sa bawat bansa, buong daigdig

na platapormang kanilang tangan

kung saan dapat magkapitbisig

ah, ito'y isa nang pagmumulat

pagkasira ng mundo'y sinuri

sa kanila'y maraming salamat

sana ang line-up nila'y magwagi

- gregoriovbituinjr.

03.04.2022

* litratong kuha ng makatang gala matapos ang forum ng PasigLibre, 03.01.2022