Pasasalamat (Grace Before Meals)

PASASALAMAT

(GRACE BEFORE MEALS)

tayo'y nasa harap nitong hapag-kainan

sabay nating bigkasin ang pasasalamat

sa mga naghanda ng pagkain ng bayan

sa mga nagtanim at nag-ani, salamat

salamat sa lahat ng mga magsasaka

mula binhi'y pinalago hanggang nag-uhay

silang sa lupang sakahan nakatali na

silang naglinang at nagpatubo ng palay

salamat sa lahat ng mga mangingisda

na nilalambat ang buhay sa karagatan

upang madala ang mga banyerang isda

sa pamilihan, at ating mabili naman

salamat sa lahat ng mga manggagawa

pagkain ay dinala sa bayan at lungsod

kay-agang gumising, kay-agang gumagawa

kayod ng kayod, kahit mababa ang sahod

salamat sa manggagawang tatay at nanay

na nagsikap upang pamilya'y mapakain

nang mga anak ay di magutom sa bahay

na para sa pamilya, lahat ay gagawin

salamat, binubuhay ninyo ang daigdig

uring manggagawa, hukbong mapagpalaya

kaya marapat lang tayo'y magkapitbisig

nang bulok na sistema'y tuluyang mawala

- gregoriovbituinjr.

03.31.2024

* mga larawan mula sa google

CHED official, inireklamo ng mga mag-aaral

CHED OFFICIAL, INIREKLAMO NG MGA MAG-AARAL

kaytinding ulat, aba'y ano na bang nangyayari?

CHED official, nireklamo ng mga estudyante

mula Our Lady of Fatima University

ang gobyerno sana'y di maging bulag, pipi't bingi

lumalabag daw sa pamantayan ng moralidad

ang nasabing opisyal na apelyido'y Darilag

kailangan daw paboran ng mga mag-aaral

ang umano'y kagustuhan ng nasabing opisyal

halimbawa ang reklamo ng MBA student

na nakumpleto naman daw ang pinasang requirement

subalit grading na incomplete ang binigay pa rin

reklamong pinarating sa tanggapan ni Bersamin

hiniling ng mga mag-aaral, tulad ni Guia

na ang nasabing opisyal ay imbestigahan na

lalo't may mag-aaral itong kinukursunada

nawa kamtin ng mga estudyante ang hustisya

- gregoriovbituinjr.

03.31.2024

* Bersamin - Executive Secretary

* ulat mula sa pahayagang Pilipino Star Ngayon, Marso 31, 2024, p.2

Tanong nila sa akin ngayong semana santa

TANONG NILA SA AKIN NGAYONG SEMANA SANTA

tanong nila, bakit di raw ako nagsimba?

bakit di rin sumama sa semana santa?

at bakit ba di rin nag-Bisita Iglesya?

bakit sa simbahan ay ayaw tumuntong na?

wala bang sinumang nagyayaya sa akin?

mga nabanggit ba'y kinatamarang gawin?

nasabi na noon, sasabihin ko pa rin

baka sa simbahan, isigaw: "Free Palestine!"

ayokong makinig sa paring nambobola

na animo'y lagi silang patay-malisya

lalo't pinupuri ang Israel sa misa

at di mabanggit ang nangyayari sa Gaza

wala akong bilib sa ganyang mga pari

patunay na burgesya'y kanilang kauri

tingin ko nga sa kanila'y mapagkunwari

bulag, pipi, at bingi silang di mawari

sabi nila, si Hesus ay hari ng Hudyo

inagaw ng Hudyo ang lupang Palestino

minamasaker pa ang mamamayan nito

tapos sasabihin nila, magsimba ako?

hanggang ngayon, akin iyang paninindigan

pag pinilt, isisigaw ko sa simbahan

"Free Palestine!" huwag nang magbulag-bulagan

magsigising kayo para sa katarungan!

- gregoriovbituinjr.

03.31.2024 (easter sunday)

* litrato mula sa google

4PH ay hagupit na kaylupit

4PH AY HAGUPIT NA KAYLUPIT

ang pabahay ay huwag ibatay sa market value
kundi sa capacity to pay nitong maralita
ang pabahay ay serbisyo, huwag gawing negosyo
ito'y isang katotohanang dapat maunawa

ang 4PH daw ay pang-ISF, o pang-iskwater
ngunit hindi pala, dapat mayroon kang Pag-Ibig
binago na ang squatter, ngayon informal settler
families, kahulugang pinaganda sa pandinig

isang informal worker nga ang umamin nang tunay
wala siyang regular na sahod, kaya ang sabi:
"Hindi ko kayang bayaran ang presyo ng pabahay
ng DHSUD-4PH", kaydali nating maintindi

sino bang maralitang isang kahig, isang tuka
na sadyang gipit ang magbabayad ng isang yunit
na halaga'y higit sangmilyon, mayroon ba? wala!
4PH sa maralita'y hagupit na kaylupit

kaya di pangmaralita ang 4PH na iyan
pabahay ng gobyerno'y isang negosyo talaga
presyo ng pabahay ay ibatay sa kakayahan
at di sa market value, bilang serbisyo sa masa

- gregoriovbituinjr.
03.30.2024

* 4PH - Pambansang Pabahay para sa Pilipino Program ng pamahalaang BBM
* litratong kuha ng makatang gala sa isang rali sa harap ng tanggapan ng DHSUD, 09.11.2023

Manpower agencies, linta sa manggagawa! Buwagin!

MANPOWER AGENCIES, LINTA SA MANGGAGAWA! BUWAGIN!

sinabi nga ng kumandidatong senador noon

iyang mga manpower agencies ay mga linta

nagpapasarap sa iskemang kontraktwalisasyon

sinisipsip ang pawis at dugo ng manggagawa

dapat silang buwagin, kaya pag ako'y nanalo

matatapos na ang maliligayang araw nila

sapol na sapol sa panawagan niyang totoo

na mga manpower agencies ay linta talaga

sa Kalbaryo ng Maralita'y aming panawagan

na inilagay sa kurus upang maipabatid

sa madla iyang ginagawa nilang kamalian

oo, dapat silang buwagin pagkat di matuwid

pagsasamantala sa obrero'y dapat tapusin!

lintang manpower agencies na'y tuluyang buwagin!

- gregoriovbituinjr.

03.30.2024

* litratong kuha ng makatang gala mula sa Kalbaryo ng Maralita, Marso 26, 2024

Karapatan sa Kabuhayan, Ipaglaban!

KARAPATAN SA KABUHAYAN, IPAGLABAN!

iyan ang mensahe sa damit niya
marahil siya'y isang manininda
pinanawagang karapatan nila
sa kabuhayan, igalang talaga

ang mga vendor ay huwag gipitin
silang marangal, huwag maliitin
silang patas sa maraming usapin
upang pamilya'y kanilang buhayin

karapatan nila sa kabuhayan
ay sama-samang ipinaglalaban
bawat sentimo'y pinagsisikapan
upang anumang kita'y ipuhunan

manininda'y totoong kumakayod
gayong munting kita'y di naman sahod
sa pamilya'y katuwang at gulugod
silang sa madla'y tunay kung maglingkod

ating dinggin ang panawagang ito
buhay na letra't mensaheng totoo
sa manininda, kami po'y saludo
taas-noo't marangal magtrabaho

- gregoriovbituinjr.
03.29.2024

* litratong kuha ng makatang gala sa rali sa Kongreso laban sa ChaCha, Marso 20, 2024

Kayraming maka-Diyos ang di makatao

KAYRAMING MAKA-DIYOS ANG DI MAKATAO

mas nais kong magsulat kaysa sundin sila

sa tradisyon nila tuwing semana santa

tangi kong nagawa'y magsulat ng pabasa

para sa rali ng dalita sa Mendiola

kayraming maka-Diyos ang di makatao

kapitalistang inaapi ang obrero

elitistang palasimba subalit tuso

sa obrero'y walang paki, una'y negosyo

oo, di man lang nila itaas ang sahod

ng manggagawang araw-gabing kumakayod

tubo muna, obrero man ay manikluhod

pati batas ay kanilang pinipilantod

pang-ISF daw ang 4PH, bukambibig

ng gobyerno, na madalas nating marinig

ngunit etsapwera ka kung walang Pag-Ibig

pambobola nila'y dapat nating mausig

palasimba kahit pangulong maka-Diyos

na sa EJK umano'y siyang nag-utos

sa ChaCha, bansa'y binubuyangyang ng lubos

binebenta sa dayo ang bayang hikahos

sa kanila, ang semana santa'y bakasyon

silang nagtaguyod ng kontraktwalisasyon

kaya di ako lumalahok sa tradisyon

buti kung patungo iyan sa rebolusyon

- gregoriovbituinjr.

03.29.2024

* ISF - informal settler families, bagong tawag sa iskwater

* 4PH - Pambansang Pabahay para sa Pilipino Program

* EJK - extrajudicial killings