Huwag magpaputok ng baril sa Bagong Taon

HUWAG MAGPAPUTOK NG BARIL SA BAGONG TAON

huwag pong magpaputok ng baril sa pagsalubong

sa Bagong Taon, samo sa mayayabang na maton

huwag pong kalabitin ang gatilyo ng gloc, magnum,

kwarenta'y singko, beretta, sumpak, paltik man iyon

magtorotot na lang, o tansan ay pakalansingin

sa ganito na lang ang paligid ay paingayin

maging ligtas, sarili't pamilya'y ingatan man din

huwag magpaputok upang kapwa mo'y pasayahin

kayrami nang nawalan ng buhay nang matamaan

ng balang ligaw, hiyaw ng pamilya'y katarungan

kung sino ka mang may baril, makonsensya ka naman

baril ay huwag iputok para lang masiyahan

nandyan ang batang sina Stephanie Nicole Ella,

Vhon Alexander Llagas at Rhanz Angelo Corpuz pa

tinamaan ng ligaw na bala, walang hustisya

sinumpak si Ranjelo Nimer, suspek ay huli na

ah, bakit nga ba katarungan ay sadyang kay-ilap

lalo't nabibiktima'y pawang mga mahihirap

huwag balewalain itong simpleng pakiusap

baka may matamaan ka't problema itong ganap

- gregoriovbituinjr.

12.29.2022

Mga pinaghalawan:

https://newsinfo.inquirer.net/1378231/new-year-casualty-stray-bullet-kills-12-year-old-girl-in-lanao-del-norte

https://newsinfo.inquirer.net/333953/shooter-seeks-forgiveness-for-death-of-4-year-old-boy

https://www.ucanews.com/news/girl-killed-by-new-years-eve-stray-bullet/66998

https://www.philstar.com/headlines/2015/01/02/1408601/stray-bullet-kills-girl-another-fights-life

https://www.manilatimes.net/2014/01/01/news/top-stories/infant-killed-by-stray-bullet/64437

Tsapa

TSAPA

pribadong pagmamay-ari ng mga kasangkapan

sa produksyon ang talagang ugat ng kahirapan

iyan lang ang tsapa ng may-ari ng pagawaan

upang obrero'y maapi't mapagsamantalahan

dapat itong mapagtanto ng manggagawa't dukha

upang pagsasamantala'y tuluyan nang mawala

upang sila'y magsikilos sa layuning dakila:

ang itayo ang lipunan ng uring manggagawa

- gregoriovbituinjr.

12.28.2022

* litrato mula sa google

Pagdalaw sa mga bilanggong pulitikal

PAGDALAW SA MGA BILANGGONG PULITIKAL

sumama kami tungong bilibid

binisita ang mga kapatid

at kasamang doon nangabulid

pamaskong handog ang inihatid

at kami'y nakipagkumustahan

sa loob ano nang kalagayan

pagkain, inumin, kalusugan

mga gamot nilang kailangan

nag-iisip din ng security

silang persons deprived of liberty

upang ipagtanggol ang sarili

sa hirap at sa dusa'y sakbibi

kaunti man ang pamaskong handog

problema yaong mas iniluhog

walang dalaw, puso'y nadudurog

tila buhay nila'y papalubog

nagsiuwian man kami ngayon

subalit di pa tapos ang misyon

paano susulong at tutulong

upang laya'y makamit paglaon

- gregoriovbituinjr.

12.26.2022

Tibak

TIBAK

mula noong estudyante'y naging tibak na

nang magkauban ay tibak pa ring talaga

buhay na payak, puspusang pakikibaka

iyan ang prinsipyong sa puso't diwa'y dala

di mo ba nauunawaan ang tulad ko

bata pa'y misyon ko nang maglingkod sa tao,

sa uri't sa bayan, kahit na may delubyo

itatag ang nasang lipunang makatao

labanan ang katiwalia't kasakiman

di lang ng dayuhan kundi ng kababayan

inadhika'y maglingkod sa uri at bayan

at bulok na sistema'y tuluyang palitan

ganyan ang buhay ko'y nais maisalaysay

sa dukha't uring obrero'y lingkod na tunay

nais kong magkaroon ng lipunang pantay

tutuparin ang pakay hanggang sa mamatay

- gregoriovbituinjr.

12.21.2022

Saysay

SAYSAY

di ko hanap noon kung ano ang saysay ng buhay

di ako pilosopikal na tao, siyang tunay

nang maging aktibista'y nakita ko na ang saysay

di na ako naghanap pa't narito na ang pakay

payak na pamumuhay, puspusang pakikibaka

diyan umiinog ang prinsipyo ko't kaluluwa

alay na ang buhay upang mabago ang sistema

at paglaban sa mga tuso't mapagsamantala

di ko pinili ang magpayaman nang magpayaman

kundi guminhawa pati ang buong sambayanan

ang yaman o kayabangan ay aanhin ko naman

kung dangal ng kapwa'y aapakan at yuyurakan

unawa mo ba ang katulad ko't iyo bang watas

sa mga gatla sa noo ko'y iyong mababakas

kaya hayaan lamang sa aking piniling landas

upang aking matupad ang adhika hanggang wakas

- gregoriovbituinjr.

12.21.2022

Karapatan ng tao't kalikasan

KARAPATAN NG TAO'T KALIKASAN

siyang tunay, may karapatan din ang kalikasan

tulad ng karapatang pantaong dapat igalang

kaylangan para sa batayang pangangailangan

para sa malinis na tubig, ligtas na tahanan,

karapatan sa pagkain, mabuting kalusugan

sa ganito raw matitimbang ang ating daigdig

sa karapatan ng tao't kalikasan tumindig

halina't kumilos at ito'y ating isatinig

upang mapangalagaan, tayo'y magkapitbisig

upang ang sinumang sumisira nito'y mausig

- gregoriovbituinjr.

12.15.2022

* litratong kuha ng makatang gala sa Human Rights Festival, na pinangunahan ng grupong IDEFEND, 12.10.2022

Habambuhay na mithi

HABAMBUHAY NA MITHI

di magmamaliw ang habambuhay na mithi

upang mapawi ang pribadong pag-aari

na pang-aapi't pagsasamantala'y sanhi

kahit karapatang pantao'y napalungi

dapat bawiin ang dignidad ng paggawa

sa kapitalismo'y huwag nang magparaya

dapat walang pribadong pag-aari, wala

nang walang ganid sa salapi, dusa't luha

dapat walang pag-aari, walang gahaman

at nang-aapi dahil sa kanilang yaman

dapat igalang ang pantaong karapatan

ng lahat, kahit dukha, di ng iilan lang

dapat ay walang nagmamay-ari ng lupa,

o gamit sa produksyon sa anumang bansa

dapat lang pamahalaan ito ng tama

upang walang nagsasamantalang kuhila

ah, darating din ang panahong mapapawi

iyang lahat ng pribadong pagmamay-ari

kung obrero'y magkakaisa bilang uri

upang itayo ang lipunang minimithi

- gregoriovbituinjr.

12.12.2022

Prinsipyo

PRINSIPYO

tangan ko sa puso'y adhika

niring hukbong mapagpalaya

silang kamay na pinagpala

silang nagpaunlad ng bansa

sila ang uring manggagawa

matagal na silang siphayo

magkaisa na silang lalo

nang kapitalismo'y masugpo

sistemang bulok ay igupo

nang lipunan nila'y itayo

makamanggagawang lipunan

may paggalang sa karapatan

sistemang wala nang gahaman

at kamtin ng api ang asam

nilang hustisyang panlipunan

tangan sa puso ang prinsipyo

na makadalita't obrero

na pinapangakong totoo

mula dibdib, tiyan, at ulo

ito'y tangan ko hanggang dulo

- gregoriovbituinjr.

12.10.2022

Imbestigahan ang sabwatan

IMBESTIGAHAN ANG SABWATAN

doon sa tanggapan ng Kagawaran ng Paggawa

ay nagsikilos ang mga babaeng manggagawa

imbestigahan ang sabwatan ng mga kuhila

kaya nagsara ang pabrikang pinasukang sadya

huwad na pagsasara'y isyu nila't panawagan

upang ang may kagagawan niyon ay matalupan

upang sila nama'y bayaran o ibalik naman

upang hibik nilang hustisya'y kanilang makamtan

hibik ng manggagawa sana'y dinggin mo, O, DOLE 

maging patas sa desisyon, at talagang magsilbi

sa mga maliliit, sa manggagawang inapi

at di sa mga kuhila't dupang na negosyante

taasnoong pagpupugay sa mga nagsikilos

na babaeng obrerong ayaw sa pambubusabos

ng sistemang sa kabulukan ay talagang puspos

tuloy ang laban! nawa'y magtagumpay kayong lubos!

- gregoriovbituinjr.

11.28.2022

* litratong kuha ng makatang gala sa pagkilos sa 

harap ng DOLE sa Intramuros, Maynila, 11.21.2022

Sahod Itaas, Presyo Ibaba!

SAHOD ITAAS, PRESYO IBABA!

kaytagal na ng panawagan

ng manggagawa't mamamayan

sa kapitalistang lipunan

ngunit sila ba'y pinakinggan?

Sahod Itaas! Presyo Ibaba!

ngunit may napala ba tayo

sa animo'y binging gobyerno

minsan lang tumaas ang sweldo

nang pinaglaban ng obrero

Sahod Itaas! Presyo Ibaba!

presyo ng bigas ba'y bumaba

o pagtaas ay mas higit nga

gasolina nga ba'y bumaba

o sirit ng presyo'y palala

Sahod Itaas! Presyo Ibaba!

ang matupad ito'y kailan?

dinggin kaya ang kahilingan?

ngunit tayo'y magpatuloy lang

may nagagawa ang paglaban!

- gregoriovbituinjr.

11.27.2022

Bakas

BAKAS

may kurot sa dibdib sa gaya naming maralita

na namumuhay ng marangal ngunit sinusumpa

may kirot sa puso't tinuturing na hampaslupa

kaya dignidad nami'y pinagtatanggol na lubha

kaya maging aktibista'y taospusong niyakap

dahil tulad ninuman, kami rin ay nangangarap

ng maunlad na buhay na di pansariling ganap

kundi pangkalahatan, ang lahat ay nililingap

isinasabuhay ang panuntunang aktibista

simpleng pamumuhay at puspusang pakikibaka

kamtin ang karapatan at panlipunang hustisya

pakikipagkapwa't paglilingkod sa uri't masa

patuloy na pupunahin ang mga kabulukan

kapalpakan at katiwalia'y nilalabanan

di lang pulos dayuhan kundi tusong kababayan

lalo ang lingkod bayang di nagsisilbi sa bayan 

sinusundan namin ay bakas ng mga bayani

na binabaka'y pagsasamantala't pang-aapi

ang tungkulin ko'y para sa bayan, di pansarili

alay ang buhay para sa tao; tayo, di kami

- gregoriovbituinjr.

11.24.2022

Ipagtanggol ang karapatan ng paggawa

IPAGTANGGOL ANG KARAPATAN NG PAGGAWA

nang mabatid ang pagkilos ng uring manggagawa

doon sa tanggapan ng Kagawaran ng Paggawa

agad kaming nakiisa't nakibaka ring sadya

upang karapatan nila'y ipagtanggol ngang lubha

dahil sila ang lumikha ng ating ekonomya

walang pag-unlad sa ating bayan kung wala sila

silang nagpapatakbo ng makina sa pabrika

lumilikha ng produkto, ngayo'y nakikibaka

di munting mangangalakal ang kanilang kalaban

kundi internasyunal na kumpanyang anong yaman

limpak-limpak na ang tubo, sagad sa kabundatan

nais pa ngang mag-ekspansyon sa buong daigdigan

di pa mapagbigyan ang hinihingi ng obrero

ayon sa Konstitusyon, makabubuhay na sweldo

living wage, hindi minimum wage, sadyang makatao

ngunit barat na sweldo'y likas sa kapitalismo

baka tatalunin sila ng kumpanyang karibal

na tulad din nila'y korporasyong multinasyunal

kung di babaratin ang manggagawa, sila'y hangal

ayaw magpakatao ng kapitalistang banal

kaya dapat manggagawa'y patuloy na kumilos

wakasan ang sistemang mapangyurak sa hikahos

walang dangal sa kapitalismong mapambusabos

bulok na sistema'y dapat nang tuluyang matapos

- gregoriovbituinjr.

11.23.2022

* kuha ng makatang gala sa pagkilos ng mga manggagawa sa harap ng DOLE, 11.21.2022

May pag-asa pa

MAY PAG-ASA PA

may pag-asa pa bang mabago ang sistema

kung wala, bakit sa mundo'y naririto pa

mayroong pag-asa kaya nakikibaka

dito na lang kumakapit, tatanggalin pa?

hindi ba't may kasabihan ang matatanda

na hangga't may buhay, may pag-asa, di ba nga?

magsikap lang, pag may tiyaga, may nilaga

sa patuloy na pagkilos, may mapapala

hangga't may nangangarap ng laya ng bayan

mula pangil ng kapitalismo't gahaman

sa patalim man o pag-asa manghawakan

araw ay sumisikat pa rin sa silangan

kaya halina't magpatuloy sa pagkilos

laban sa kaapihan at pambubusabos

laban sa pagsasamantala ng malignos

na bundat na sa tubo'y di pa makaraos

- gregoriovbituinjr.

11.23.2022

Sa Rali ng Paggawa

SA RALI NG PAGGAWA

naroon akong sa kanila'y nakiisa

bilang isang dating obrero sa pabrika

panawagan nila'y tunay kong nadarama

na tagos sa diwa, puso ko't kaluluwa

machine operator noon ng tatlong taon

nang maisabatas ang kontraktwalisasyon

nang kabataan pa't di na naglilimayon

nang panahong sa buhay ay maraming kwestyon

oo, kayrami naming lumahok sa rali

upang manawagan sa tanggapan ng DOLE

sa kapitalista ba sila nagsisilbi?

o dapat sa manggagawang sinasalbahe?

tingnan mo ang kayraming nilatag na isyu

kontraktwalisasyon, maitaas ang sweldo

ang tanggalan sa pabrika, kayraming kaso

pati na karapatan ng unyonisado

tila ang paggawa'y dinaanan ng sigwa

sa batas niring kapitalismong kuhila

minimithi'y kamtin sana ng manggagawa

parusa ang sa kanila'y nagwalanghiya

- gregoriovbituinjr.

11.22.2022

Hoy, kapitalista, magbayad ka!

HOY, KAPITALISTA, MAGBAYAD KA!

ang sulat sa plakard, "Trabaho, Hindi Bayad"

basahin mo, mabilis ang bigkas sa "Bayad"

kung mabagal ang bigkas, pinapipili ka

kung trabaho o bayad, alin sa dalawa

ngunit mabilis ang bigkas, naunawaan

ang trabaho ng obrero'y di binayaran

hindi makatarungan ang kapitalista

tanging hinihingi ng obrero'y hustisya

kaya panawagan ng mga manggagawa

bayaran ang trabaho't bayaran ng tama!

sa kapitalista, hoy, magbayad ka naman!

obligasyon sa obrero'y huwag takbuhan

pinagtrabaho sila, kaya magbayad ka!

at kung di ka magbabayad, magbabayad ka!

- gregoriovbituinjr.

11.21.2022

* Litratong kuha ng makatang gala sa pagkilos ng mga manggagawa sa DOLE, 11.21.2022

Ang Diyos ng Kapital

ANG DIYOS NG KAPITAL

ang kapitalista'y nagpapadasal

habang manggagawa nila'y kontraktwal

tila ba siya'y nagpapakabanal

habang manggagawa nila'y kontraktwal

limpak ang tubo ng mangangalakal

ngunit manggagawa pa ri'y kontraktwal

bilyon-bilyon ang tubong kinakamal

ngunit manggagawa pa ri'y kontraktwal

sa pabrika'y malimit magpamisa

upang umunlad pa raw ang kumpanya

ngunit doon sa loob ng pabrika

sa manggagawa'y mapagsamantala

lakas-paggawa'y di bayarang tama

sa trabaho'y lampas sa oras pa nga

lakas ng manggagawa'y pigang-piga

subalit sahod pa'y sadyang kaybaba

ganyan ang pagpapakatao't asal

ng mga kapitalistang marangal

ayaw pang iregular ang kontraktwal

obrero ma'y nagtrabahong kaytagal

binawi lang daw ng mangangalakal

ang mga ginastos nila't kapital

kahit manggagawa nila'y kontraktwal

maregular ito'y di itatanghal

- gregoriovbituinjr.

11.21.2022

Manggagawa

MANGGAGAWA

manggagawang sagad na sa trabaho

subalit kaybaba naman ng sweldo

tila sa paggawa'y naaabuso

tila aliping inaagrabyado

bakit ba napagsasamantalahan?

ang mga obrerong tigib kaapihan

ng mga kapitalistang gahaman

dahil di magkaisa't nalamangan?

sa kapital ba'y may utang na loob

dahil nagkatrabaho kaya subsob

sa pabrika't sa init ay nasuob

wala nang pahinga't nasusubasob

ingat, manggagawa, magkapitbisig

upang may mapala't huwag magpalupig

ipakita yaong prinsipyo't tindig

lalo't daming pinakakaing bibig

pamilya at kapitalistang bundat

ang binubuhay habang binabarat

ang natatanggap na sweldong di sapat

ah, manggagawa'y dapat pang mamulat

- gregoriovbituinjr.

11.20.2022

Green Energy

GREEN ENERGY

ang Climate Strike ay katatapos lang

na anong titindi ng panawagan

dagdag one point five degree kainitan

ay huwag abutin ng daigdigan

fossil fuel at coal ay itigil na

maging ang liquified natural gas pa

tayo'y mag-renewable energy na

upang sagipin ang tanging planeta

ang korporasyon at kapitalismo

yaong sumisira sa tanging mundo

laging mina doon at mina dito

ang gubat at bundok pa'y kinakalbo

para sa laksang tubong makakamal

ay walang pakialam ang kapital

mahalaga'y tubo ng tuso't hangal

mundo't kinabukasa'y binubuwal

mensahe ng Climate Strike ay dinggin

planetang ito'y ipagtanggol natin

planetang tahanan ng anak natin

planetang pangalagaan na natin

sa COP 27, aming mensahe:

gawin ang sa mundo'y makabubuti

No to False Solutions! ang aming sabi

tara sa renewable Green Energy!

Loss and Damage at Climate Debt, bayaran!

sistemang bulok na'y dapat palitan!

sistemang kapitalismo'y wakasan!

tangi nating planeta'y alagaan!

- gregoriovbituinjr.

11.18.2022

* litrato mula sa app game sa internet

Stop VAWC

STOP VAWC

Stop VAWC o Violence Against Women and Children!

kaming mga lalaki'y ito rin ang hiyaw namin

mga babae't bata'y huwag saktan o apihin

dangal nila'y respetuhin, sila'y pakamahalin

si misis nga, mag-away man kami'y di sinasaktan

pagkat siya'y tulad ng ina kong dapat igalang

lalo na't ako'y isang aktibista sa lansangan

kaya lumaking may paggalang sa kababaihan

babae ang kalahati ng buong mundo, di ba?

bawat tao'y nagmula sa sinapupunan nila

pakatandaang may karapatan ang bawat isa

ina, anak, manggagawa, dukha, sinuman sila

di rin dapat saktan ang mga bata, lalo't anak

pag lumaking may sindak, sila rin ay maninindak

alagaan sila't huwag hayaang mapahamak

ang misyon: Stop VAWC ay gawin nating palasak

- gregoriovbituinjr.

10.14.2022

* tulang ito'y inihanda para sa Nobyembre 20 - World Children's Day at Nobyembre 25 - International Day for the Elimination of Violence Against Women

Ang pagtutol nang walang pagkilos ay pagsang-ayon

ANG PAGTUTOL NANG WALANG PAGKILOS AY PAGSANG-AYON

"Dissent without action is consent" anang kasabihan

ah, ito'y matalim at malalim na kaisipan

batayang pangangailangan na'y nagmamahalan

tulad ng bigas, tubig, kuryenteng dapat bayaran

tutol ka sa ganito pagkat masakit sa bulsa

apektado na ang badyet mo para sa pamilya

ngunit magagawa mo bang tumutol nang mag-isa?

sa mga hirap at daing mo kaya'y pakinggan ka?

kaya may kilos-protesta na pagkilos ng tao

sa sama-samang pagkilos, may maipapanalo

kung tutol ka ngunit ayaw lumahok sa ganito

paano maisasatinig ang hinaing ninyo

tama namang magpetisyon, sama-samang isulat

sa kinauukulan ang daing ng masang lahat

di ba't sa sama-samang pagkilos kakamting sukat

upang mapababa ang presyong sa bulsa'y kaybigat

ang pagtutol nang walang pagkilos ay pagsang-ayon!

sabi ng matatanda noon magpahanggang ngayon

tutol ang kalooban, sa hirap na'y binabaon

ngunit sa sama-samang pagkilos ay di kaayon?

tumututol ngunit takot sagupain ang mali?

tila paghihirap nila'y nais mapanatili?

bakit di kumilos, kalampagin ang naghahari

sa sama-samang pagkilos makakamit ang mithi

- gregoriovbituinjr.

11.08.2022

Maging tinig ng api

MAGING TINIG NG API

anong magagawa mo sa kanilang walang tinig

habang panaghoy at hinaing nila'y naririnig

magsawalang kibo ba't kunwa'y walang naulinig

hindi, kundi sa kanila'y makipagkabitbisig

kung di nila masabi ang kanilang dinaranas

kung di rin nila maisatinig ang pandarahas

tayo na'y magsilbing tinig nila upang malutas

ang kanilang hinaing, lipunan man ay di patas

kung magagawa para sa kanila'y magsalita

ay ihiyaw natin ng buong pagpapakumbaba

ang kanilang mga hibik at sanhi ng pagluha

ang karapatan nila'y ipaglaban nating kusa

sabi sa Kartilya, ipagtanggol ang inaapi

kasunod pa nito'y kabakahin ang umaapi

kung magiging tinig ng api, huwag maging pipi

maging boses ng maliliit, sa masa magsilbi

- gregoriovbituinjr.

11.02.2022    

Salamat sa mga tumatangkilik

SALAMAT SA MGA TUMATANGKILIK

pasasalamat naming pawa

sa lahat ng tumatangkilik

sa Taliba ng Maralita

na sa ulat at akda’y siksik

sa mga dukha’y aming handog

ang munti naming pahayagan

isyu nilang iniluluhog

mababasa rito ng tanan

dito’y pinapakita naming

sila'y may dignidad na tangan

na dapat nirerespeto rin

ng mahirap man o mayaman

pinaglalaban namin sila

tungo sa lipunang maayos

upang ang bulok na sistema'y

mapawi't tuluyang matapos

- gregoriovbituinjr.

10.27.2022

* Unang nalathala sa Taliba ng Maralita, isyu ng Oktubre 16-31, 2022, pahina 20

Aklat

AKLAT 

sadyang kaysaya ko / sa bigay na aklat

ng isang kasama, / maraming salamat

sa pakiwari ko'y / makapagmumulat

nang umunlad yaring / prinsipyo't dalumat

munting libro itong / kaysarap namnamin

na makatutulong / sa iwing mithiin

upang puso't diwa'y / sadyang patibayin

sa mga prinsipyo't / yakap na layunin

mapaghiwalay man / ang balat sa buto

nawa'y ating kamtin / ang asam sa mundo:

pakikipagkapwa't / pagpapakatao

itayo'y sistema't / bayang makatao

paksa't nilalaman / nito'y mahalaga

na kung maunawa'y / susulong talaga

isinasabuhay / ang pakikibaka

at muli, salamat / sa aklat, kasama

- gregoriovbituinjr.

10.27.2022

Bilhin mo lang ang tinapay na gusto mo

BILHIN MO LANG ANG TINAPAY NA GUSTO MO

huwag kang bibili ng tinapay na di mo gusto

kung pinabili ka ng tinapay para sa grupo

na kung di nila kainin, kakain nito'y sino

lalo kung ikaw na bumili ay ayaw din nito

ah, sayang lamang ang tinapay na iyong binili

sayang ang pagod at perang dito'y ipinambili

kung paboritong tinapay ang binili'y mabuti

na kung di nila galawin ay di ka magsisisi

buti kung sinabi nila kung anong gusto nila

pandesal, pandelemon, pandecoco, ensaymada

subalit pag sinabi sa iyo'y bahala ka na

aba, ang bilhin mo'y ang paborito mo talaga

upang kung di man maubos tiyak na may kakain

pag tapos na ang pulong, ikaw ay may babaunin

- gregoriovbituinjr.

10.25.2022

Pagdalo sa Balik-Alindog, Bantayog

PAGDALO SA BALIK-ALINDOG, BANTAYOG

Maikling sanaysay ni Gregorio V. Bituin Jr.

Isa ang inyong lingkod sa agarang tumugon sa "Balik-Alindog, Bantayog" na proyekto ng Bantayog ng mga Bayani. Kaya inabangan ko ang petsang Oktubre 22, 1pm.

Ayon nga sa paanyaya ng Bantayog ng mga Bayani: "KITAKITS! Sama na sa first cleanup day sa Bantayog ng mga Bayani Foundation! Welcome ang bata o matanda. Tayo nang maglinis para sa katotohanan. Magsuot ng tamang damit. Magdala ng gwantes. Magdala ng kaibigan."

Nagdala ako ng gwantes at basahan upang mayroong magamit naman  at hindi nakatunganga. Dumating ako roon ng ika-12:30 ng tanghali, naghintay, hindi ko mga kilala ang mga naroon. Wala ang mga taga-PAHRA, PhilRights, BlockMarcos at iba pang grupong kilala ko. Gayunman, nang makita ako ng Executive Director ng PAHRA na si Ms. Mae ay kinumusta niya ako at buti raw ay nakarating. Sa kanyang talumpati ay binanggit niya ako bilang makata na dumalo sa nasabing pagtitipon.

Nagsalita roon si Atty. Chel Diokno na siyang Chairman ng Bantayog. At nag-emcee si Jun "Bayaw" Sabayton, na nang makita ako ay sinabing "O, nandito ka pala." Naroon din si Prof. Xiao Chua, na siya ring unang kumausap sa akin, "Hindi ba, nagkasama tayo sa Climate Reality? May bago ka bang libro diyan?" Ang sagot ko'y oo. Tamang-tama naman na may dala akong 101 Poetry at Liwanag at Dilim ni Jacinto, na binili naman niya.

Naglibot muna kami sa Bantayog Museum, bago ang paglilinis. Doon kami naglinis sa harap ng Bantayog ni Inang Bayan. Habang kami'y nagwawalis ng mga kalat na dahon, ay biglang umulan kaya natigil kami sa paglilinis, na ang mga nagpatuloy ay yaong mga nakakapote. Naubusan na ng kapote kaya wala akong nakuha, na sana'y patuloy din sana ang paglilinis ko.

Sumilong muna ang mga walang kapote, at nakita ako ng isa sa mga nag-organisa na basa ang tshirt, kaya binigyan niya ako ng tshirt na pula, na may tatak na Balik-Alindog, Bantayog, na may maliit na letrang @bantayogngmgabayani sa itaas ng malalaking letra.

Dahil sa patuloy na paglakas ng ulan, tinapos na ang programa bandang ika-3:30 ng hapon. Bago matapos ang programa ay nag-interbyu pa si Jun Sabayton, at isa ako sa natawag. Tanong niya: "Bakit mahalaga ang ginagawa nating ito?" Ang naging tugon ko, "Mahalaga ang paglilinis sa Bantayog kung gaanong mahalaga rin ang kasaysayan, at linisin din natin ito sa mga historical distortion."

Ako naman ay nagpaalam na bandang ikaapat ng hapon upang umuwi. Nang makauwi na'y naghanda ako ng tula hinggil sa aktibidad na ito na taospuso kong inaalay sa bawat nakiisa.

BALIK-ALINDOG, BANTAYOG

kaygandang layunin ng Balik-Alindog, Bantayog

tanggalin yaong duming sa puso'y nakadudurog

linisin ang kasinungalingan sa bayang irog

na kay Inang Bayan ay maibalik ang alindog

pagmamahal sa bayan ang paglinis nito ngayon

simbolo ng paglaban sa historical distortion

ating handog sa mga susunod pang henerasyon

mula sa mga pasakit, bayan ay maiahon

pagkilos ito ng mamamayang kumakandili

sa katotohanang ipinaglalabang matindi

sa mga naging martir na sa bayan ay nagsilbi

sa nakatayo nang Bantayog ng mga Bayani

ah, ibalik ang alindog ng Bantayog na ito

sagisag ng laksang buhay na naisakripisyo

para sa bayan, hustisya't karapatang pantao

sa sama-samang pagkilos ay kakamting totoo

- gregoriovbituinjr.

10.22.2022

Sa bawat hakbang

SA BAWAT HAKBANG

sa bawat hakbang, patuloy pa ring nakikibaka

upang kamtin ng bayan ang panlipunang hustisya

itatag ang sistemang walang pagsasamantala

ng tao sa tao, walang kaapihan ang masa

sa bawat hakbang, kinakapa anong nasa budhi

kundi ang kabutihan ng kapwa't bayan kong sawi

durugin ang mapagsamantalang sistemang sanhi

ng laksa-laksang kahirapan ng maraming lipi

sa bawat hakbang, kalikasa'y pangangalagaan

kapaligiran ay di dapat maging basurahan

huwag minahin ang lupang ninuno't kabundukan

lutasin ang polusyon sa hangin at kalunsuran

sa bawat hakbang, sinasabuhay, sinasadiwa

ang prinsipyong makatao't makauring adhika

di nakalutang sa hangin, ang paa'y nasa lupa

para sa bayan, kapwa dukha't uring manggagawa

sa bawat hakbang, naglalakad sa daang maputik

o sa tigang na lupang pagkadukha'y natititik

sa kawalan ng hustisya, puso'y naghihimagsik

katarungan para sa lahat yaring aking hibik

- gregoriovbituinjr.

10.19.2022    

Ka-birthday ko'y desaparesido

KA-BIRTHDAY KO'Y DESAPARESIDO

ka-birthday ko'y desaparesido

human rights worker siyang totoo

subalit dinaklot ng kung sino

noon, sa panahon ng marsyalo

Oktubre Dos nang sinilang siya

Mahatma Gandhi'y ka-birthday niya

sa active non-violence nanguna

tinuring na bayani sa Indya

Albert Enriquez ang kanyang ngalan

Top Ten student sa paaralan

sa Student Council naging chairman

nagsilbi ng mabuti sa bayan

nang siya'y pauwi na'y dinukot

na umano'y militar ang sangkot

yaong nangyari'y nakakalungkot

baka buhay na niya'y nilagot

hanggang ngayon, di pa nakikita

yaong katawan o bangkay niya

nahan na ang asam na hustisya

sana bangkay niya'y makita pa

ito pa rin ang sigaw ng madla:

panagutin ang mga maysala!

hustisya kay Abet na winala

katarungan sa bawat winala!

- gregoriovbituinjr.

10.16.2022

Awit

AWIT

pagpupugay sa mga mang-aawit ng uri't bayan

sa kanilang makabuluhang kanta sa sambayanan

itinataas ang moral ng mga kababaihan

ng uring manggagawa, ng maralita't kabataan

kanilang inilarawa'y sistemang puno ng dugo

sa panahong pulos dahas na buhay ang iginupo

na pati karapatang pantao'y dinuduro-duro

sistema ng bu-ang ay dapat tuluyan nang maglaho

bakas sa awit ang prinsipyo nila't paninindigan:

"Labanan ang karahasan! Igiit ang katarungan!"

nakita nilang sistema'y dapat baguhing tuluyan

at lipunang makatao'y itayo ng sambayanan

mabuhay kayong mang-aawit, tunay na inspirasyon

salamat sa inyong mga liriko't mabuting layon

dignidad ng uri at ng bayan ay iniaahon

mula sa kumunoy ng sistemang dapat nang ibaon

- gregoriovbituinjr.

10.15.2022

Pagsirit ng pamasahe

PAGSIRIT NG PAMASAHE

Mayo, pamasahe pa ri'y nwebe

Hunyo, sampu na ang pamasahe

Hulyo, pamasahe'y naging onse

Oktubre, ang minimum na'y dose

upang madagdagan din ang kita

nilang tsuper na namamasada

gaano man kasakit sa bulsa

ng pasaherong hirap talaga

mga nangyari'y napakabilis

nang sumirit ang presyo ng langis

buti't masa pa'y nakakatiis

inis na'y di makita ang inis

galit na'y di makitang magalit

bagamat lihim na nagngingitngit

karapatan ay di maigiit

baka maridtag ng mga pangit

pamasahe na'y nagtataasan

ngunit walang magawa ang tanan

magtipid at magtiis na lamang

habang wala pa ring welgang bayan

- gregoriovbituinjr.

10.14.2022

Komunal

KOMUNAL

mabigat ang imaheng umuukilkil sa isip

kapara ng balaraw na sa likod ko'y humagip

may pag-asa bang ang bayang nagdurusa'y masagip

sa kuko't bituka ng mapagsamantala't sipsip

noong primitibo komunal, walang pang-aapi

lahat ay nagbibigayan, walang makasarili

may paggagalangan, kapwa'y di isinasantabi

tribu'y pinangangalagaan ng mga bagani

sa panahon ngayon ng paghahari ng agila

kapitalistang nabundat na'y nais bumundat pa

habang manggagawa'y tila langgam sa sipag nila

mababang sweldo'y pinagtitiyagaan talaga

pribadong pag-aari ang ugat ng kahirapan

kaya mayamang iilan ay lalong yumayaman

habang laksang dukha'y batbat pa rin ng karukhaan

anumang sipag at tiyaga'y di pa rin umalwan

abanteng lipunang komunal ang pinapangarap

matayo ang lipunang makatao't mapaglingap

upang dukha'y maiahon sa kumunoy ng hirap

lalo't uring manggagawa'y magkakaisang ganap

- gregoriovbituinjr.

10.11.2022

Kami

KAMI

totoo kami sa pakikibaka

seryoso kami sa pakikibaka

matapat kami sa pakikibaka

narito kami sa pakikibaka

kaya huwag nila kaming gaguhin

ang masa'y huwag nilang gagaguhin

uring manggagawa'y huwag gaguhin

kaming mga dukha'y huwag gaguhin

patuloy kami sa aming layunin

patuloy kami sa aming mithiin

patuloy kami sa aming hangarin

hanggang asam na tagumpay ay kamtin

kumikilos kami ng buong tapat

kumikilos kami ng nararapat

- gregoriovbituinjr.

10.08.2022

Kaymahal

KAYMAHAL

kaymahal ng kuryente,

tubig at pamasahe;

tuwa ng negosyante

na tubo'y balde-balde

masa na'y sinasagpang

ng tuso't mapanlamang;

kayrami na ring utang

ang di pa sinisilang

pahirap ng pahirap

ang buhay ng mahirap;

kailan malalasap

ang ginhawang pangarap

sweldo ng manggagawa

ay talagang kaybaba;

negosyanteng kuhila

sa tubo tiba-tiba

masa’y umaatungal

sa bayaring kaymahal;

magmura’y mauusal

kahit isa kang banal

di sapat ang panggugol

ng masang tumututol;

sistemang di na ukol

ay dapat nang maputol

- gregoriovbituinjr.

09.24.2022

Anim na oras na trabaho kada araw

Sigaw ng maralita:

ANIM NA ORAS NA TRABAHO KADA ARAW

anim na oras na trabaho ang hiling ng dukha

upang madagdagan ang labor force, ang manggagawa

bukod sa bahay, sinisigaw na rin nilang kusa:

“TRABAHO PARA SA WALANG TRABAHONG MARALITA!”

sigaw na nila: TRABAHO'Y GAWING ANIM NA ORAS!

kung may tatlong obrero sa paggawang otso-oras

sa loob ng isang araw, ah, sa anim na oras

ay magiging apat na ang obrero, di ba, patas?

mungkahi iyan ng dukha upang magkatrabaho

tatlong manggagawa pa'y naging apat na obrero

kawalan ng trabaho'y nasolusyunang totoo

di na mukhang kawawa pag dukha na'y may trabaho

tanggalin din ang age limit, dapat ding ikampanya

upang may edad man, magkatrabaho, kung kaya pa

sa ganito, maralita'y may dignidad nang kanya

at mabubuhay pa nila ang mahal na pamilya

- gregoriovbituinjr.

08.12.2022

* litrato mula sa blog ng KPML

Walden

WALDEN

aba'y laman siya ngayon ng mga pahayagan

siyang binabaka yaong nakaambang karimlan

siyang lumalaban sa mga kasinungalingan

siyang matapang na ihayag ang katotohanan

tangan kaya ng anak ng diktador ang pambura?

ng kasaysayang nais nilang mabago talaga?

katotohanan kaya'y tangan ba naman ng masa?

ayaw mabaluktot ang naganap na diktadura?

dudurugin ang estratehiya ng mandarambong

at mga halimaw na sa bayan ay gumugunggong

huwag hayaang kumalat ang fake news o halibyong

huwag hayaang bayan ay punuin ng linggatong

sa panahon noon ng ama, ikaw na'y napiit

kumilos para sa karapatan ng maliliit

isinulong ang adhikain at lipunang giit

sa panahon ngayon ng anak, muli kang napiit

ituloy mo ang laban, inspirasyon ka sa amin

habang ipinaglalaban mo'y tinutuloy namin

taas-kamaong pugay sa tangan mong adhikain

pagkat magkasangga nating lalabanan ang dilim

- gregoriovbituinjr.

08.10.2022

Paglalaba sa kanal

PAGLALABA SA KANAL

binidyuhan ko lang nang makita

ang isang matandang naglalaba

sa tubig ng kanal, sa bangketa

dahil tubig ba'y libre talaga?

kita kong malakas ang pag-agos

ng tubig, baka kaya nilubos

ng matanda, paglaba'y rinaos

lalo't sa buhay siya'y hikahos

bakit kanal ang nilabhang lubha?

nitong matandang tingnan mo't dukha?

kawawang buhay ng maralita

baka wala pang bahay si Tanda

ayoko pang tingnan siyang baliw

kundi sa pagbidyo pa'y naaliw 

matandang kapara'y basang sisiw

na marahil iniwan ng giliw

- gregoriovbituinjr.

08.09.2022

* ang bidyo na 15 segundo ang haba ay nasa kawing na: https://fb.watch/eOd7NSrM28/

Hatid

HATID

wala ka raw doon noong panahon ng marsyalo

anang matanda't makagintong panahon sa iyo

wala rin tayo noong panahon ni Bonifacio

panahon ni Julius Caesar ay nabasa lang ito

marsyalo, wala ka pa nang karapata'y siniil

maganda raw ang gintong panahon, anang matabil

ay, wala rin tayo nang si Bonifacio'y kinitil

noong Romano sa kapangyariha'y nanggigigil

inihahatid ka sa nais burahing gunita

na sa katotohanan ay wala kang mapapala

payag ka bang kasaysayan ay sinasalaula?

upang krimen nila sa baya'y mapawi't mawala?

dapat lang nating ipaglaban ang dangal ng bayan

ang gunita ng dinahas, iwinala't pinaslang

di dapat halibyong ang umiral sa kasaysayan

katotohanan ay huwag ihatid sa kawalan

- gregoriovbituinjr.

07.29.2022

halibyong - fake news, ayon sa UP Diksiyonaryong Filipino, p.426

Eman Lacaba

EMAN LACABA

I

isinilang noong Araw ng Karapatang Pantao

pinaslang sa anibersaryo ng Jabidah Massacre

siya si Eman Lacaba, manunulat, prinsipyado

naging mandirigma noong diktador pa'y nasa poder

manunulat na maraming nakamit na gantimpala

guro, artista sa entablado, organisador din

pag wala raw papel, siya'y nagsusulat sa palara

palaisip na tibak, mangangatha rin ng awitin

natanggal sa pagkaguro nang sumama sa aklasan

ng manggagawa, at siya'y nagpasiya nang mamundok

upang maging mandirigma't tagapagtanggol ng bayan

patuloy pa ring nagsulat, may baril mang nakasuksok

natagpuan ng kaaway, agad silang pinutukan

mga kasama'y napatay, dalawa silang natira

walang ititirang buhay, ayon sa mga kalaban

unang binaril ay buntis, sumunod ay siya naman

II

ang mandirigmang maraming tula sa Philippines Free Press

sa bahay ng biyenan ko'y nahalungkat ko't tinipon

ang makatang tinulad kay Rimbaud na makatang Pranses

taospusong pagpupugay sa halimbawa mo't layon

ang Cultural Center of the Philippines nama'y lumikha

ng Gawad Eman Lacaba na para sa manunulat

na kabataan, mga mananalaysay, at makata

natatanging gawad sa paglilingkod at pagmumulat

- gregoriovbituinjr.

07.15.2022

* Halaw ang mga datos sa Bantayog ng mga Bayani

* Emmanuel Lacaba (Disyembre 10, 1949 - Marso 18, 1976)

Bakit dapat natin tutulan ang PAREX?

BAKIT DAPAT NATIN TUTULAN ANG PAREX (PASIG RIVER EXPRESSWAY)?

Habang rumaragasa ang COVID-19 sa nakalipas na dalawang taon, naging abala ang San Miguel Corporation (SMC) Infrastructure sa pagtulak ng dambuhalang proyektong sa wari nito ay paiikliin ang biyahe mula Manila hanggang Rizal sa loob ng 15 minuto. Magsisilbi rin umano itong ugnay ng hilaga at timog na lalong magpapabilis sa mga biyahe sa mga lugar dito. Ang proyektong ito ay ang Pasig River Expressway Project o PAREX. Babaybayin nito ang 19.37 kilometrong kahabaan ng Ilog Pasig na tatagos sa mga siyudad ng Maynila, Mandaluyong, Makati, Pasig at Taguig. Pero ang PAREX ay hindi lamang usaping trapiko. Maaaring magdulot ito ng panandaliang tugon sa problema sa trapiko pero sa huli mas lalamang ang perwisyong dulot ng PAREX kaysa benepisyo.

MGA DAHILAN

1. DEMOLISYON AT SAPILITANG PAGLIKAS. Upang itayo ang PAREX, kakailanganin nitong matiyak ang akses ng mga eksipo (equipment). Nanganganib ang mga komunidad maralita na maaaring tukuying daanan para sa mga kasangkapan sa pagtatayo ng expressway. Demolisyon at sapilitang paglilikas ang ibig sabihin nito. Marami sa mga komunidad maralita ang matatagpuan sa kahabaan ng Ilog Pasig.

2. PAGPATAY SA ILOG PASIG. Ilang dekada na ang tinagal ng mga insiyatiba para buhayin ang Ilog Pasig mula pa sa panahon ni dating pangulong Fidel V. Ramos hanggang sa kasalukuyan. Bagaman malaki-laki pa ang kailangang gawin, malayo na ang inunlad ng pagpapasigla ng Ilog Pasig. Tatabunan ng PAREX ang Ilog Pasig sa kahabaan kung saan ito itatayo. Maaari itong ikamatay ng mga halaman at hayop dahil sa pagkawala ng init mula sa araw. Magsasagawa din ng dredging ang SMC na tinuring na paglilinis ng ilog. Bukod sa wawasakin ang mga lamang tubig dahil sa dredging, malaking katanungan kung saan iimbakin at itatapon ang mahigit 54,000 toneladang dredge materials.

3. PAGLALA NG POLUSYON. Taliwas sa sinasabi ng SMC Infractructure, hindi bababa ang pagbuga ng maruruming hangin tulad ng carbon dioxide kapag naitayo ang PAREX. Bagkus, dahil sa pagdagsa ng mga sasakyan ay lalala ang polusyon sa hangin. Lubhang peligroso ito sa mga kabahayan at komunidad na katabi ng itatayong expressway. Bukod sa usok, isang problema rin ang ingay o noise pollution.

4. PAGLALA NG GHG EMISSIONS, PAGLALA NG KRISIS SA KLIMA. Sa sariling pagtaya ng SMC, aabot sa 63,000 tonelada ang ibubugang carbon dioxide sa pagtatayo pa lang ng PAREX. Mas tataas pa ito kapag dinagsa at dinaanan na ito ng libu-libong sasakyan. Ang sobra-sobrang konsentrasyon ng carbon dioxide sa himpapawid ay pangunahing dahilan ng pag-init ng planeta o global warming, Mababalewala ang pagsusumikap ng kapwa pambansa at lokal na pamahalaan na pababain ang greenhouse gas emissions (GHG) dahil sa mga proyektong tulad ng PAREX.

5. PELIGROSO SA LINDOL. Sa sariling pag-aaral ng SMC, hindi nito matiyak ang kaligtasan ng mga dadaan sa PAREX kapag tumama ang malakas na lindol tulad noong Intensity IX 1968 Casiguran Earthquake at 1990 Luzon Earthquake. Itatayo ang PAREX sa liquefaction hazard area o lugar na malambot o lumalambot ang lupa. Wala mang lindol, peligroso ang PAREX dahil sa mismong pagtatayuan nito.

6. WAWASAKIN ANG MGA MAKASAYSAYANG GUSALI. Mismo ang SMC ang nagtukoy na may 15 historical sites ang nasa loob ng 1 km radius ng PAREX pero hindi nito binabanggit alin dito ang direktang tatamaan. May tatlong historical sites ang dadaanan ng PAREX, hindi kasama rito ang Intramuros na nasa ruta rin ng proyekto.

7. PAGLABAG SA PHILIPPINE ENVIRONMENT IMPACT STATEMENT (EIS) SYSTEM. Depektibo at kapos ang environmental impact statement (EIS) na ginawa ng San Miguel Corporation para sa PAREX. Imbes na maglinaw kung paano tutugunan ang nakikitang epekto ng PAREX sa kalikasan at komunidad, mas maraming isyu ang hindi nasasagot tulad ng usapin ng lindol, pagbaha, alikabok, epekto sa Ilog Pasig, atbp. Bukod sa laman ng EIS, depektibo rin ang naging proseso na magtitiyak ng makabuluhang paglahok ng mga stakeholders halimbawa na dito ang ginawang online public hearing kung saan naka-mute ang mga participants at walang opsyon na makapagpahayag ng saloobin dahil "disabled" ang chatbox.

* MAY ALTERNATIBA. Hindi totoo na walang alternatiba at ang tanging pagtatayo lamang ng PAREX ang solusyon nila sa problema sa trapiko. Ilan sa mga alterbatiba ay ang pagpapaunlad at pagpapalawig ng Pasig Watercraft Transport, pagpapaunlad ng public transport system sa Metro Manila, kasama na yung mga railway system at pagtatayo ng 20-kilometrong bike route sa tabi ng Ilog Pasig.

Philippine Movement for Climate Justice (PMCJ)

Kadastro

KADASTRO

ilang beses kong narinig sa usaping palupa

ang salitang KADASTRO sa isyu ng maralita

na sa pananaliksik pala'y salitang Kastila

ang sukat ng lupa sa lungsod at sa lalawigan

ay nasusulat sa kadastro na isang talaan

na iniingatan sa nakatalagang tanggapan

kaya sa isyung pabahay ng kapwa mahihirap

ang usaping ito'y dapat mabatid naming ganap

lalo't ipinaglalaban ang tahanang pangarap

magkaroon ng bahay ay karapatang pantao

ngunit bawat metro kwadrado ng lupa'y magkano

mura sa malayo, mahal na pag may market value

aaminin ko, na di pa ako nakakakita

ng kadastro sa pampamahalaang opisina

na sa aking haraya, ito ba'y matriks o mapa?

nakita ko dati ay mapa ng lugar, may sulat

nakadrowing ang lupa, marahil may mga sukat

iyon ba'y kadastro, kung hindi pa, daghang salamat

- gregoriovbituinjr.

07.14.2022

* litrato mula sa UP Diksiyonaryong Filipino, p. 539

Himagsikang panlipunan

HIMAGSIKANG PANLIPUNAN

Pinagmulan: Eugène Pottier, Chants Révolutionnaires (ikalawang edisyon), Paris, Bureau de Comité Pottier, [n.d.] ;

Isinalin mula Pranses ni Mitchell Abidor;

CopyLeft: Creative Commons (Attribute & ShareAlike) marxists.org 2018.

Malayang salin mula sa Ingles ni Gregorio V. Bituin Jr.

15 pantig bawat taludtod

Nakita nang lumitaw ang dambuhalang halimaw,

Ang malalaking kilabot at ang mga bagito,

Ang mga heneral pati ang mga kaparian

Lahat sila’y nangatal: ang sandal na’y dumatal!

Dinagundong ng lintik yaong mata’t angking bisig,

Hindi palihim na kumikilos yaong Paggawa:

Kumikilos  iyon at gumagana nang hayagan

At nag-oorganisa nang walang sinumang amo!

Anila: “Sa daigdig at sa mga bunga nito,

Sa mga kasangkapan at lahat ng nalilikha,

Nilahad mo ang iyong kamay: isuko mo sila!"

"At dumating kayo, na nakamamatay na multo

Upang makibahagi lang ba sa pamumuhunan?"

"Upang ipamahagi? Hindi! Upang kunin lahat!

sa Manchester noong 1881

* Isinalin noong Hulyo 3, 2022

* Litrato mula sa google

* Talasalitaan

dambuhala - salin ng great, imbes na dakila

halimaw - salin ng colossus, imbes na higante o malaki

bagito – salin ng parvenus

SOCIAL REVOLUTION 

Source: Eugène Pottier, Chants Révolutionnaires (second edition), Paris, Bureau de Comité Pottier, [n.d.] ;

Translated: by Mitchell Abidor;

CopyLeft: Creative Commons (Attribute & ShareAlike) marxists.org 2018.

Seeing the great colossus appear,

The big shots and the parvenus,

The generals and priests

All of them are trembling: the moment has arrived!

Thunder bolt eyes and bare arms,

Labor doesn’t act in secret:

It works openly

And will organize without master!

It says: “On the globe and its fruits,

On tools and all produced,

You laid your hands: give them up!”

“And so you come, fatal specter

To share in capital?"

"To share it? No! To take it all!

Manchester 1881