Pangarap ng kabataan

PANGARAP NG KABATAAN

mga anak ng manggagawa, may mga pangarap

na sila'y makaalpas na sa dusa't paghihirap

ang buhay na may dignidad ay kanilang malasap

mayroong magandang bukas at may ginhawang ganap

simpleng pangarap nilang mga kabataan, bata

walang nagsasamantala sa amang manggagawa

walang yumuyurak sa dignidad ng ama't dukha

ang pamamalakad ng batas ay patas sa bansa

tiyak ayaw ng mga bata sa trapong kawatan

ayaw sa mga magnanakaw sa kaban ng bayan

tiyak, isisigaw nila, "Sana, matino naman

ang mahalal na Pangulo ng mahal nating bayan!"

bansang ang karapatang pantao'y nirerespeto

pamahalaang may paggalang sa wastong proseso

mayorya sa kanila'y anak ng dukhang obrero

ama'y kayod ng kayod para sa kaunting sweldo

at para sa kinabukasan: Manggagawa Naman

ihalal nating Pangulo, Ka Leody de Guzman

para sa maayos na pamumuhay, kalusugan

magandang edukasyon, magandang kinabukasan

- gregoriovbituinjr.

03.31.2022

Pambihirang pagkakataon

PAMBIHIRANG PAGKAKATAON

binigay ng kasaysayan ngayon

ay pambihirang pagkakataon

noon, labanan ng mga trapo

ngayon, pagkakataon na ito

kandidatong Pangulo'y obrero

Manggagawa Naman ang iboto!

ito'y di natin dapat sayangin

kasaysayan na'y panig sa atin

Ka Leody de Guzman, Pangulo

Ka Walden Bello, Bise Pangulo

para Senador, Luke Espiritu

Roy Cabonegro at D'Angelo

kandidatong palaban talaga

dala'y Partido Lakas ng Masa

mapanuri, makakalikasan

at nakikibaka sa lansangan

para sa karapatan ng bayan

para sa hustisyang panlipunan

h'wag sayangin ang pagkakataon

ipanalo natin sila ngayon!

- gregoriovbituinjr.

03.30.2022

Maralita, bida pag eleksyon

MARALITA, BIDA PAG ELEKSYON

pag nangampanya'y trapong kuhila

pulos pangako sa maralita

kaytatamis ng mga salita

pangako'y rosas, langit at tala

tuwing halalan, bida ang dukha

trapong hudas ay pulos pangako

gagawin ng buong puso kuno

ngunit lagi na lang napapako

humaba na ang ilong at nguso

nilang trapong mapagbalatkayo

trapo'y papasok pa sa iskwater

sa putikang kayraming minarder

na dukha, kunwa'y di mga Hitler,

noong war on drugs ng nasa poder

hihimas-himas pa sa pagerper

maralita, bida pag eleksyon

ngunit pag trapo'y nanalo ngayon

pangako'y balewala na roon

dukha'y bida lamang pag eleksyon

para iboto ang trapong iyon

dahil sa dami ng maralita

sila ang nililigawang sadya

subalit sila ba'y may napala

pinangakuan, binalewala

kailan matututo ang dukha?

- gregoriovbituinjr.

03.29.2022

Tulaan

TULAAN

tara, tayo'y tumula

ng samutsaring paksa

at doon isadula

ang buhay nating sadya

ikwentong pataludtod

ang bawat nating pagod

pawis, sikap at kayod

pati mababang sahod

isalaysay sa saknong

ang pasyang urong-sulong

tulad ng chess at gulong

plano'y saan hahantong

bilangin man ang pantig

na isinasatinig

dapat nating mausig

ang mga manlulupig

tula ang buhay natin

kathain ang paksain

anong isyu't usapin

sa madla'y bibigkasin

- gregoriovbituinjr.

03.29.2022

* litratong kuha noong World Poetry Day

Pagmamahalan

PAGMAMAHALAN

mahal na ang tubig at kuryente

gasul, gasolina't pamasahe

at ang pangunahing binibili

bigas, sahog, isda, gulay, karne

anong tindi ng pagmamahalan

ng batayang pangangailangan

presyo'y sumisirit nang tuluyan

anong sakit sa puso't isipan

pagmamahalang bakit ganoon

sa mamamayang di makaahon

sahod nga'y nakapako lang doon

di na tumaas, di maibangon

"Sahod Itaas! Presyo Ibaba!"

ang sigaw ng mga manggagawa

kahilingang dapat lang at tama

upang sa hirap ay makawala

- gregoriovbituinjr.

03.27.2022

- litratong kuha ng makatang gala sa pagkilos sa DOLE, 03.14.2022

Buwis

BUWIS

kung iyang buwis ng bayan

magamit sa kagalingan

ng mga kababaihan

aba'y sadyang ayos iyan

paano ang double burden

na kaytagal nang usapin

ang reproductive health pa rin

ay paano sasagutin

dinggin ang kanilang hiyaw

"Make taxes work for women" daw

na kapag iyong nanilay

ay makabuluhang tunay

ang "Make taxes work for women"

ay mahalagang usapin

panawagang dapat dinggin

ng pamahalaan natin

sa plakard, iyon ang tangan

ni Ka Leody de Guzman

ating kandidato naman

bilang Pangulo ng bayan

dinggin ang hiling at sabi

buwis - gamiting mabuti

wasto, sapat at maigi

para sa mga babae

- gregoriovbituinjr.

03.27.2022

- litratong kuha ng makatang gala noong Araw ng Kababaihan

Lakas ng bisig

LAKAS NG BISIG

Manggagawa, binubuhay n'yo'y buong daigdigan

nilikha't pinaunlad ang ekonomya ng bayan

gumawa ng mga tulay, gusali, paaralan

highway, Senado, Kongreso, Simbahan, Malakanyang

Manggagawa, may kaunlaran nang dahil sa inyo

ngunit nagsisilbi sa mapagsamantalang amo

kulang sa pamilya ang sahod, kaybaba ng sweldo

gayong lipunan at bansa ang pinaunlad ninyo

tulad ng magsasaka, sa pawis ninyo nanggaling

ang ekonomya ng bansa at kinakain namin

subalit kayong Manggagawa'y naghihirap pa rin

dapat sarili n'yo'y tubusin sa pagkaalipin

kung wala kayong Manggagawa ay walang pag-unlad

ang sistemang kapitalismo'y sadyang di uusad

Manggagawa ang bayani, nagbigay ng dignidad

nagpaunlad ng daigdigan, ng bansa, ng syudad

Manggagawa, salamat sa lakas ng inyong bisig

subalit kapitalismo'y dapat nating malupig

tagapamandila ng sistemang ito'y mausig

pagkat mundong ito'y sa inyong nawalan ng tinig

- gregoriovbituinjr.

03.26.2022

Espasyong ligtas

ESPASYONG LIGTAS

espasyong ligtas ba ang M.R.T.

sa mga ginang at binibini

laban sa tarantado't salbahe

na kung makatingin ay buwitre

parang lalapain ang babae

buti't M.R.T.'y may paalala

na doon ay ipinaskil nila

Safe Spaces Act, tandaan mo na

sa text, facebook, saanmang lugar pa

bawal ang pambabastos talaga

salamat sa M.R.T. sa paskil

paalalang dapat magsitigil

ang sa social media'y nanggigigil

sa M.R.T. mismo'y di magpigil

sa kanilang libog, dagta't pangil

nais natin ng espasyong ligtas

kung saan wala nang mandarahas

mandarambong, trapong sukab, hudas

kundi lipunang pantay, parehas

na namumuhay tayo ng patas

- gregoriovbituinjr.

03.26.2022

* litratong kuha ng makatang gala habang nag-aabang ng tren sa M.R.T.

Ang takot sa debate

ANG TAKOT SA DEBATE

di kayang makipagdebate ng utak-diktador

magdikta lang ang alam ng kupal na horrorable

sasapitin ng masa sa kanila'y pulos trobol

anong gusto'y gagawin, que barbaridad, que horror

di kayang makipagdebate nilang mga kupal

na nasanay mamuno sa paraang diktaduryal

tulad ng kanilang amang sa bayan ay garapal

naku! kawawa ang bayan pag sila ang nahalal!

dahil sa debate makikita kung sino sila

kung karapat-dapat ba silang mamuno sa masa

subalit kung laging absent sa debate, alam na

aba'y mahahalata ang pagiging bugok nila

dahil maging diktador ang alam sa pamumuno

gayong ayaw ng tao sa ganyang klaseng pinuno

bentador ng bayan, berdugo ng masa, hunyango

di dapat iboto ang ganyang sukab at palalo

- gregoriovbituinjr.

03.25.2022

Tatak sa kamiseta

TATAK SA KAMISETA

tila poster ang sa t-shirt tatak

na talaga kang mapapalatak

di man nahihili'y nagaganyak

na magsuot din ng gayong gayak

bibili ako ng t-shirt ngayon

at patatatakan na rin iyon

heat press daw ang tawag sa ganoon

magbigay lang ng disenyo roon

magplano muna bago bumili

nang may maganda namang diskarte

ang disenyo'y planuhing mabuti

nang dama'y saya, kawili-wili

sa bawat araw ay susuutin

sa paanyayang iboto natin

ang kandidatong talagang atin

Manggagawa Naman, panalunin!

- gregoriovbituinjr.

03.25.2022

Senador Luke

SENADOR LUKE

abogado ng masa, palaban

mapanuri sa isyung pambayan

siya'y talagang maaasahang

ilaban ang ating karapatan

ngalan niya'y Ka Luke Espiritu

ang ating Senador ng obrero

at kinatawan ng pagbabago

panlaban sa dinastiya't trapo

misyon ay baguhin ang sistema

para sa panlipunang hustisya

kalusin ang mapagsamantala

pati bundat na kapitalista

misyong baligtarin ang tatsulok

durugin ang trapong nakasuksok

sa bulsa ng negosyanteng hayok

sa tubong sa likod nakaumbok

trapo't dinastiya na'y sugpuin

hustisyang panlipunan ay kamtin

Luke Espiritu, kasangga't atin

sa Senado'y ipagwagi natin

- gregoriovbituinjr.

03.24.2022

Sama-samang pagkilos

SAMA-SAMANG PAGKILOS

may kakamtin din tayo sa sama-samang pagkilos

upang mawakasan ang sistemang mapambusabos

upang makaalpas sa buhay na kalunos-lunos

upang guminhawa ang buhay ng kapwa hikahos

walang manunubos o sinumang tagapagligtas

ang darating, kundi pagkilos, samang-samang lakas

maghintay man tayo, ilang taon man ang lumipas

kung di tayo kikilos, gutom at dahas ang danas

mga kapwa api, kumilos tayong sama-sama

at iwaksi na ang  mapagsamantalang sistema

kaya nating umunlad kahit wala ang burgesya

na sa masa'y deka-dekada nang nagsamantala

kapara nati'y halamang tumubo sa batuhan

na di man diniligan, nag-aruga'y kalikasan

tulad ng mga dahong sama-samang nagtubuan

kumilos tayo't baguhin ang abang kalagayan

sa sama-samang pagkilos, tagumpay ay kakamtin

ito'y katotohanang sa puso't diwa'y angkinin

dudurugin ang sistemang bulok, papalitan din

ng makataong lipunang pinapangarap natin

- gregoriovbituinjr.

03.23.2022

A Walk for Ka Leody...

A WALK FOR KA LEODY,

WALDEN, AND THEIR LINE UP

IS A WALK FOR CLIMATE JUSTICE

4.22.2022 (Earth Day)

7am-12nn

from Bonifacio Monument in Caloocan

to Bantayog ng mga Bayani in QC

to People Power Monument in Mandaluyong

with Poetry Reading of Tagalog poems

Concept:

This activity is a walk and awareness campaign which will be held on Earth Day, 4.22.2022, for our candidates less than three weeks before the May election.

Presidential candidate Ka Leody de Guzman joined us during our Climate Walk from Luneta to Tacloban in 2014, a year after supertyphoon Haiyan, popularly known as Yolanda, landed in the Philippines that killed more than 5,000 people. Ka Leody also spoke about climate emergency and also calls for climate justice.

Vice Presidential candidate Walden Bello is an internationally known activist who has written many topics on economy and ecology.

Candidates for Senator Atty. Luke Espiritu and the two known environmentalist Roy Cabonegro and David D'Angelo is also knowledgeable and actively campaining in this respect and can clearly explain their call for climate justice to the masses.

Ka Lidy Nacpil, an internationally known activist fighting for several decades now for Climate Justice, is the second nominee of PLM Partylist.

Let's join us in this Walk for Climate Justice on Earth Day, because "A Walk for Ka Leody, Walden, and their line up is a WALK FOR CLIMATE JUSTICE!"

Mechanics ng nasabing Alay-Hakbang para sa Klima:

Ang paglalakad ay sisimulan ng mga volunteer, na maaaring lima hanggang sampung katao. May hawak na malaking banner na nakasulat ang: "A Walk for Ka Leody, Walden, and their line up is a WALK FOR CLIMATE JUSTICE”. 

Upang hindi masyadong hingalin ang mga maglalakad o sasama sa Alay-Hakbang para sa Klima, maaaring may magsimula lamang mula Bonifacio monument hanggang Balintawak market, at papalitan na sila ng isa pang set ng maglalakad.

Istasyon ng paglalakad:

(1) Magsisimula ang paglalakad mula sa Monumento ni Gat Andres Bonifacio sa Lungsod ng Caloocan hanggang Balintawak market. Pahinga ng sampung minuto.

(2) Paglalakad mula Balintawak market hanggang SM North. Pahinga ng sampung minuto.

(3) Paglalakad mula SM North hanggang Bantayog ng mga Bayani. Pahinga ng sampung minuto.

(4) Paglalakad mula Bantayog ng mga Bayani hanggang Farmers, Cubao. Pahinga ng sampung minuto.

(5) Paglalakad mula Farmers, Cubao hanggang People Power Monument.

Magkakaroon ng munting programa sa People Power Monument. Kasabay nito’y ang Tulaan sa Earth Day, kung saan ang mga tula ay batay sa facebook page na 60 Green Poems for April 22 and for our Green Candidates. 

Nawa’y mahilingan nating magsalita sa aktibidad na ito ang ating mga kandidatong sina Ka Leody de Guzman, Ka Walden Bello, Atty. Luke Espiritu, at syempre ang dalawa nating environmental senatoriables na sina Roy Cabonegro at David D’Angelo.

Bukod sa tulaan sa nasabing paglalakad, ang gabi ng April 22 ay inilaan natin para sa TULAAN o poetry reading sa BMP-KPML office sa Lungsod ng Pasig. 

Hiling po namin ang inyong suporta sa gawaing ito. Mabuhay kayo!

Greg Bituin Jr.

participant, Climate Walk from Luneta to Tacloban (October 2, 2014 - November 8, 2014)

participant, French leg of the People's Pilgrimage from Rome to Paris (November 7, 2015 - December 14, 2015)

Sa Timog-Katagalugan

SA TIMOG-KATAGALUGAN

nagpapatuloy ang kampanyahan

doon sa Timog-Katagalugan

upang maipagwaging tuluyan

ang kandidato sa panguluhan

maipanalo si Ka Leody

ng masang ating kinukumbinsi

lalo sa mga bagong botante

na sa bagong pulitika'y saksi

kahit tumatagaktak ang pawis

ang ikinakampanya'y malinis

walang korupsyon o bahid-dungis

ngunit magaling makipagtagis

anti-dinastiyang pulitikal

anti-trapo at anti-kriminal

anti-burgesya't anti-pusakal

ang sistema nga'y kanyang inaral

line-up niya'y ating ipanalo

sa pagka-Bise'y si Walden Bello

bilang Senador: Luke Espiritu,

Roy Cabonegro, at D'Angelo

doon sa Timog-Katagalugan

sigaw namin: Manggagawa Naman

P.L.M. partylist, atin iyan

para sa uri, para sa bayan

- gregoriovbituinjr.

03.21.2022 World Poetry Day

Pagtula

PAGTULA

di napuntahan ang toreng garing

upang magsanay maging magaling

ngunit napunta sa magigiting

na bayaning may mabuting supling

isinilang akong walang-wala

sa daigdig na puno ng sigwa

binigay ko ang lahat sa tula

dito ako dinala ng mutya

na kilalang Musa ng Panitik

na haraya'y tigib, liglig, siksik

na binungang diwa'y sadyang hitik

upang itula ang masa't hibik

patuloy ako sa paglalakbay

tinawid yaong bundok at tulay

at nilangoy ang laot ng malay

ay patuloy sa pagkatha't pakay

hanggang mailarawan sa akda

ang pinagsamantalahang dukha

at mga naaping manggagawa

dahilan sa sistemang kuhila

dahon ng kalikasa'y naluoy

di magawang pakuya-kuyakoy

paa ko'y lumubog sa kumunoy

subalit sa pagtula'y patuloy

- gregoriovbituinjr.

03.21.2022 World Poetry Day

#2 Ka Leody

#2 KA LEODY

number two sa balota

ang Pangulo ng masa

Ka Leody, siya na

pampangulo talaga

Leody Manggagawa

mabuti ang adhika

layon niya'y dakila

para sa uri't madla

Ka Leody de Guzman

mapanuri, palaban

ang kasangga ng bayan

para sa panguluhan

makasaysayang takbo

kandidato'y obrero

bilang ating Pangulo

na dapat ipanalo

siya si Ka Leody

ang ating Presidente

kaytagal ng kakampi

ng dukha, masang api

kaya ang ating mithi

ang siya'y ipagwagi

ang Pangulo ng uri,

ng bayan, at ng lahi

- gregoriovbituinjr.

03.20.2022

Ka Luke Espiritu

KA LUKE ESPIRITU

si Ka Luke Espiritu

hindi lang abogado

siya'y lider-obrero

ilagay sa Senado

palaban, mapanuri

prinsipyado, may mithi

sa bayan at sa uri

iboto't ipagwagi

kasangga ng paggawa

at mga maralita

may mabuting adhika

may layuning dakila

para sa sambayanan

para sa kalikasan

Luke Espiritu naman

ang Senador ng bayan

- gregoriovbituinjr.

03.20.2022

Istiker sa motor

ISTIKER SA MOTOR

nakakatuwa ngang talaga

ang motorsiklo ng kasama

nagbigay-pagpapahalaga

sa mga pambáto ng masa

may istiker ni Ka Leody

na si Ka Walden ang katabi

P.L.M. partylist, malaki

na ang numero ay wan-tu-tri

kung mabasa ng masa ito

habang dala ang motorsiklo

malalamang lider-obrero'y

kumakandidatong Pangulo

sa kasama, pasasalamat

ikaw ay nakapagmumulat

bagamat laban ay mabigat

ay may nagagawa kang sukat

sa madla'y naipaparating

ang kandidatong magigiting

sina Ka Leody't Ka Walden

sana'y maipanalo natin

- gregoriovbituinjr.

03.18.2022

Save Diliman Creek

SAVE DILIMAN CREEK

pinta sa pader: Save Diliman Creek

alamin natin ang natititik

sapa bang ito'y hitik na hitik

sa dumi, upos, basura't plastik

nadaanan ko lang naman ito

at agad kinunan ng litrato

upang maipaalam sa tao

na may problema palang ganito

paalala na iyon sa bayan

panawagang dapat lang pakinggan

tungong "Malinis na Katubigan"

pati "Luntiang Kapaligiran"

pakinggan mo ang kanilang hibik

anong gagawin sa Diliman Creek?

tanggalan na ng basura't plastik!

ang sapang ito'y sagiping lintik

"Save Diliman Creek" ay ating dinggin

sapagkat kaytinding suliranin

magsama-samang ito'y sagipin

dapat linisin, ang wasto'y gawin

sana naman ay dinggin ng madla

maging ng pamahalaan kaya

ang ganitong problema sa bansa

upang masolusyunan ng tama

- gregoriovbituinjr.

03.18.2022

Victory sign

VICTORY SIGN

naka-Victory sign na siya

sa loob ng sinakyan niya

magtatagumpay ba talaga

oo, at ating kinakaya

basta tayo'y tuloy ang laban

kaya sa halalan tandaan

ngalang Ka Leody de Guzman

para Pangulo nitong bayan

sa pagka-Bise'y Walden Bello

Senador Luke Espiritu

Senador David D'Angelo

at Senador Roy Cabonegro

VIctory sign, magandang tanda

upang kumilos tayong sadya

sa tindig, prinsipyo't adhika

para sa dukha't manggagawa

pasalamat sa mamang iyon

sa pagbibigay-inspirasyon

dahil isang malaking hamon

ang tagumpay na nilalayon

mabuhay kayong kumikilos

upang maipanalong lubos

ang mga pambatong tatapos

sa sistemang kalunos-lunos

sistemang bulok ay baguhin

sistema ng trapo'y durugin

ang tatsulok ay baligtarin

kandidato'y papanalunin

ang misyon: Manggagawa Naman

asam: pagbabago sa bayan

mithi: makataong lipunan

pangulo: Leody de Guzman

- gregoriovbituinjr.

03.18.2022

* litratong kuha ng makatang gala noong Araw ng Kababaihan

Tulaan sa 3.21

Ilang araw na lang, World Poetry Day na! May tulaan sa darating na Marso 21, 2022.

Nais mo bang magbasa ng tula, o makibahagi sa pagdiriwang ng World Poetry Day? Tara, sa BMP opis sa Pasig, sa 03.21.2022, sa ikaapat ng hapon hanggang ikawalo ng gabi. Ibidyo natin ang iyong pagtula.

Babasahin ang mga tulang nalathala na sa FB page na 101 Red Poetry for Ka Leody and Walden, at sa kanilang line up. O kung may ambag kang tula na nais mong basahin.

Maghahanda po kami ng puto, kutsinta't malamig na tubig lang po para sa ating poetry reading. Kita-kits!

TULAAN SA MARSO 21

tara't magtulaan tayo

ngayong Marso Bente-Uno

Araw ng Pagtula ito

World Poetry Day sa mundo

tara, bumigkas ng tula

hinggil sa obrero't dukha

hinggil sa danas na sigwa

hinggil sa mga makata

mga paksang samutsari

mutyang may magandang ngiti

at may mapupulang labi

paglutas sa isyu't sanhi

araw na ito'y tandaan

sabay nating ipagdiwang

dito, tayo'y magbigkasan

ng kinatha natin naman

- gregoriovbituinjr.

03.17.2022

Ipanalo ang 2 sa 2022

IPANALO ANG 2 SA 2022

Ka Leody de Guzman, numero dos sa balota

bilang Pangulo ng bansa, ihalal natin siya

at Ka Walden Bello, numero dos din sa balota

bilang Bise-Presidente, iboto natin sila

lalo na't tatlo din ang dos sa taon natin ngayon

twenty-twenty two, taon ng malalaking paghamon

pambáto ng obrero't dukha ang dalawang iyon

upang abutin ang pagbabagong asam pa noon

anila, "Manggagawa Naman sa twenty-twenty two!"

numero dos, Leody de Guzman at Walden Bello

sa Panguluhan at pagka-Bise ay ipanalo

bilang kinatawan sa tuktok ng dukha't obrero

may paninindigang kaiba sa trapong kuhila

may prinsipyong sa mahihirap ay kumakalinga

hustisyang panlipunan ang nilalayon sa madla

para sa kagalingan ng bayan ang inadhika

di nenegosyohin ang serbisyong para sa masa

di tulad ng mga trapong nakasuksok sa bulsa

ng mga bundat na pulitiko't kapitalista

di trapo, di elitista, makamasa talaga

lahat ng suporta'y taas-noo nating ibigay

silang para sa masa, buhay na'y iniaalay

sa halalang darating, ipanalo silang tunay

para sa kinabukasan ng bayan, dangal, buhay

- gregoriovbituinjr.

03.17.2022

Asam nila'y paglaya

ASAM NILA'Y PAGLAYA

kita natin ang maganda nilang nilalayon

"Ipanalo ang paglaya ng kababaihan!"

"Sagipin ang bayan mula sa diskriminasyon

at karahasan!" anong tindi ng panawagan

subalit bakit gayon? dahil ba sila'y api?

mabibigat ang danas, asawa'y nanggugulpi?

second class citizen ba ang tingin sa sarili?

turing ng sistemang patriyarkal sa babae?

"sa karahasan at diskriminasyon, sagipin

ang bayan!" suriin mo't panawagang kaylalim

di ba't sila'y kalahati ng daigdig natin?

tayong sa kanilang sinapupunan nanggaling!

samahan natin sila sa kanilang adhika

upang ipanalo ang asam nilang paglaya

palitan na ang sistemang bulok at kuhila

ng lipunang makatao't bayang manggagawa

- gregoriovbituinjr.

03.16.2022

* litratong kuha ng makatang gala noong Pandaigdigang Araw ng Kababaihan

Pagdalaw sa nayon

PAGDALAW SA NAYON

minsan, dumalaw kami sa nayon

ng maralitang may dalang layon

kami'y nagbigay ng edukasyon

paksa'y karapatan isang hapon

karapatan nila sa pabahay

ay pinag-aralan naming tunay

karapatang pantao'y matibay

na pundasyon ng dangal at buhay

kaya kami nama'y nalulugod

na karapatan ay itaguyod

dukha'y di madulas sa alulod

ng dusa't luhang kapara'y puntod

kundi mabuhay nang may dignidad

may kaginhawahang hinahangad

ang mabuhay nang di nagsasalat

kundi kabuhayan nila'y sapat

iyan din naman ang panawagan

ng kandidato sa panguluhan

at line up ng "Manggagawa Naman"

palitan ang bulok na lipunan

baguhin na ang sistemang bulok

walang trapong sa talino'y bugok

sa bulsa ng bwitre'y nakasuksok

na sistema'y nakasusulasok

masugpo na ang trapo't hunyango

at sistemang bulok na'y maglaho

lipunang makatao'y matayo

sa buong bansa, sa buong mundo

- gregoriovbituinjr.

03.16.2022

Panawagan

PANAWAGAN

asembliya nila'y dinaluhan

panawagan nila'y pinakinggan

dapat nang paigtingan ang laban

sa abotkayang paninirahan

at buhay na may dignidad naman

aba'y napakahalagang sadya

ng panawagan ng mga dukha

abotkayang pabahay sa gitna

ng mga problema, dusa't luha

ito kaya'y kanilang mapala

handa rin sila sa pagtutuos

kaya magagawa nilang lubos

magtagumpay, problema'y matapos

walang aasahang manunubos

kundi ang sama-samang pagkilos

Mabuhay ang Piglas Maralita

alam naming inyong magagawa

anong dapat upang kamting pala

ang inyong mga inaadhika

para sa mga kasapi't madla

- gregoriovbituinjr.

03.15.2022

* litratong kuha ng makatang gala, 02.27.2022

Pakiusap

PAKIUSAP

kaygalang nilang makiusap

bagamat masakit malasap

basahin mo sa isang iglap

tila puso'y hiniwang ganap

pakiusap lang po sa iyo

huwag naman ilagay dito

iyang anumang basura mo

mahiya ka naman, O, ano?

kalinisan o kababuyan?

kalikasan o basurahan?

kapaligiran ba'y tapunan?

anong tingin ng mamamayan?

basura'y saan ilalagay?

o di rin tayo mapalagay?

pakiusap man, lumalatay

sa ating budhi'y lumuluray

kaya ano nang dapat gawin

kundi paligid ay linisin

pagtatapunan ba'y saan din

pag-usapan ninyo't sagutin

- gregoriovbituinjr.

03.15.2022

* litratong kuha ng makatang gala sa isang napuntahang pamayanan

Sahod, Itaas; Presyo, Ibaba

SAHOD, ITAAS; PRESYO, IBABA

sagutan ang mga manggagawa:

"Sahod, Itaas! Presyo, Ibaba!"

sigawang naririnig ng madla

habang sa kalsada'y tumutugpa

kahilingan nila'y makatwiran

sinisigaw ay makatarungan

hiling na mapanuri, palaban

at dumadagundong sa lansangan

kaymahal na ng presyo ng bigas

nagmahal na rin ang presyo ng gas

sa probinsya, presyo ng sardinas

pareho sa N.C.R., ay, gasgas

kaya dapat din, sweldo'y pareho

sa N.C.R. at sa probinsya mo

niloloko na ang probinsyano

ng Regional Wage Board, sadyang tuso

kapitalista'y patatawirin

habang manggagawa'y lulunurin

dapat Regional Wage Board buwagin!

manggagawa'y niloloko lang din

- gregoriovbituinjr.

03.15.2022

* litratong kuha ng makatang gala sa pagkilos sa harapan ng DOLE, 03.14.2022

Dagdag sahod

DAGDAG SAHOD

makabuluhang dagdag sahod

ng manggagawa, ipaglaban

makatarungan kung masunod

ang wasto nilang kahilingan

mga manggagawa na'y gipit

sa kakarampot nilang sweldo

kaya kanilang ginigiit

na mapataas naman ito

minimum wage ng manggagawa

suriin mo't kaybabang tunay

lalo sa probinsya sa bansa

kaya dapat sweldo'y magpantay

pambansang minimum na sahod

na sevenhundred fifty pesos

kahilingang tinataguyod

upang pamilya'y makaraos

one thousand six hundred pesos daw

ayon sa NEDA ang living wage

kalahati lang pag pinataw

ay sapat na pang-minimum wage

kapitalista'y tubong limpak

kaya bulsa'y di masasaktan

obrero'y di gapang sa lusak

kung kahilingan ay pagbigyan

manggagawa, magkapitbisig

upang simpleng hiling n'yo'y kamtin

iparinig ang inyong tinig

pamahalaan nawa'y dinggin

- gregoriovbituinjr.

03.14.2022

* litratong kuha ng makatang gala sa pagkilos niyang nilahukan

Putikang daan

PUTIKANG DAAN

lulusong ka sa putikan

sa araw-araw ba naman

pagkat doon ang tahanan

sa makipot na looban

pader pa'y nakatagilid

ang banta nito'y di lingid

parang pansakal na lubid

nakakapatid ng litid

sila'y iskwater sa turing

bahay ay di nila angkin

pag minsan, walang makain

may pagpag, di gugutumin

iskwater na nalalantad

sa progresong tila huwad

istrukturang pinaunlad

nagniningning ngunit hubad

umunlad ang mga tulay

at gusaling matitibay

di umunlad dukhang buhay

na animo'y nasa hukay

maalikabok ang daan

lalo't araw, kainitan

dahil kagabi'y umulan

ay nagputik ang lansangan

nasaan na ang pag-unlad

kung putik ang nilalakad

dukha'y ginhawa ang hangad

ngunit sa hirap ay babad

ang daan man ay maputik

kung masa'y magkapitbisig

kung karapatan ay giit

kakamtin din yaong langit

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Makipot sa looban

MAKIPOT SA LOOBAN

napakakipot ng daan

sa pinuntahang looban

mga dukha'y tinitirhan

ang lupang di ari't yaman

baka mapalayas sila

sa lupang di pa kanila

nagpapatulong ang masa

sa pananahanan nila

bahay nila'y dikit-dikit

barongbarong, maliliit

pag apoy ay pinarikit

sunog na sa isang saglit

bakit sistema'y ganito

ang tanong nila't tanong ko

silang mamamayan dito

ay iskwater sa bayan ko

araw-gabi, kumakahig

nagugutom, inuusig

silang mga walang tinig

ay dapat magkapitbisig

ganyang buhay sa looban

hirap din ang kalooban

ang kaginhawahang asam

ay kailan makakamtan

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Panawagang pangkalusugan

PANAWAGANG PANGKALUSUGAN

mahalagang pundasyon ng mga kababaihan

ang ipaglaban ang kalusugan ng mamamayan

namnamin lamang natin ang kanilang panawagan

nang pinaglalaban nila'y ating maunawaan:

"Pandemya sa kalusuga't kahirapan, wakasan!"

"Universal Health Care ay ipatupad at pondohan!"

panawagang mapagpalaya sa kababaihan

hiling nilang dapat tugunan ng pamahalaan

na kung si Ka Walden Bello na ating kandidato

ay maipanalo't mauupong Bise Pangulo

panawagan ng kababaihan ay sigurado

matutupad ang makatarungang hiling na ito

kaya sa kalusugan ng bayan, kasangga natin

sina Ka Leody de Guzman, lalo si Ka Walden

kaya patuloy nating isulong ang adhikain

sa kalusugan ng sambayanan, ating mithiin

- gregoriovbituinjr.

03.13.2022

* litratong kuha ng makatang gala sa rali noong Araw ng mga Kababaihan

Ka Leody para sa Climate Justice

KA LEODY PARA SA CLIMATE JUSTICE

pambato natin sa panguluhan

Ka Leody de Guzman ang ngalan

manggagawa, makakalikasan

may prinsipyo, may paninindigan

sa Climate Walk, siya'y nakiisa

ako'y saksi nang siya'y sumama

sa unang araw d'un sa Luneta

santaon matapos ang Yolanda

Climate Justice ay kanyang unawa

bilang isang lider-manggagawa

pinaliliwanag niyang sadya

kalagayan ng klima sa madla

ako ang kanilang kinatawan

sa Climate Walk, mahabang lakaran

mula Luneta hanggang Tacloban

kinaya rin, nakatapos naman

Ka Leody'y ayaw ng Just-Tiis

ang kanyang adhika'y Climate Justice

climate emergency'y bigyang hugis

nang serbisyo sa tao'y bumilis

sa Climate Justice, ating pambato

si Ka Leody para pangulo

kung nais natin ng pagbabago

Manggagawa Naman ang iboto

- gregoriovbituinjr.

03.12.2022

Pabahay para sa maralita

PABAHAY PARA SA MARALITA

"Pulitika ng mamamayan, hindi ng iilan!"

makahulugang pagbabagong dapat makagisnan

na sa panahong ito'y panawagang makatwiran

pagbabago ng sistema'y ating ipagsigawan

pagkat ang pulitika'y di lamang para sa trapo

na ang serbisyo publiko'y ginagawang negosyo

ang pag-aaring publiko'y ginagawang pribado

kaya lalo nang naghihirap ang dukha't obrero

kaya sa halalang ito'y dapat may magbago na

pagkat di na ubra iyang sistema ng burgesya

na magserbisyo sa tao'y utak-kapitalista

na halos buong bansa na ang gustong maibenta

"Bagong Botante, Bagong Pulitika!" itong nais

ng mamamayan laban sa mga mapagmalabis

sa kapangyarihan, habang ang madla'y nagtitiis

sa mga tusong trapo, bagang nila'y nagtatagis

"Pabahay para sa maralita," laging pangako

ng mga pulitikong kundi balimbing, hunyango

tuwing kampanyahan, subalit kapag nakaupo

kanilang pangako sa maralita'y napapako

"Pulitika ng mamamayan, hindi ng iilan!"

iguhit na natin ngayon ang bagong kasaysayan

isang kauri natin si Ka Leody de Guzman

na dapat nating maipanalo sa panguluhan

upang mapatupad ang kaytagal nating pangarap

sapat at abotkayang pabahay sa mahihirap

pag si Ka Leody'y manalo't maupo nang ganap

ay mapatupad ito sa dukhang dapat malingap

- gregoriovbituinjr.

03.12.2022

* litratong kuha ng makatang gala noong Women's Day    

P750 minimum wage para sa lahat

P750 MINIMUM WAGE PARA SA LAHAT

minimum na sweldong pitongdaan limampung piso

sa buong bansa para sa ating kapwa obrero

plataporma ito ng ating mga kandidato

kayganda, na siyang ipatutupad pag nanalo

di gaya ngayon, Regional Wage Board umiiral pa

kaya iba ang sahod ng obrero sa probinsya

sa N.C.R. nga, five hundred thirty seven pesos na

habang three hundred pesos lang doon sa Cordillera

apatnaraan dal'wampung piso sa Gitnang Luzon

at apatnaraang piso naman sa CALABARZON

sa MIMAROPA, three hundred twenty pesos lang doon

sa Bicol, kaybaba, three hundred ten pesos lang iyon

mas mataas sa BARMM kaysa Bicol ng kinse pesos

parang Eastern Visayas, three hundred twenty five pesos

sa Western Visayas ay three hundred ninety five pesos

sa rehiyon ng Davao, three hundred ninety six pesos

gayong halos pare-pareho ang presyo ng bigas

sa lahat ng rehiyon, kahit presyo ng sardinas

bakit sweldo'y magkaiba pa, dapat iparehas

ganito ang nais natin, isang lipunang patas

gayong sa loob ng pagawaan, sahod at tubo

ang pinagbatayan, di dahil lugar ay malayo

kaya pag ating pambato'y manalo, napipinto

na ang Regional Wage Board ay tuluyan nang maglaho

pantay-pantay na sweldo sa lahat ng manggagawa

di pa living wage ang pinag-uusapan ng madla

seven hundred fifty pesos minimum wage sa bansa

ito'y makatarungan lang, obrero'y guminhawa

- gregoriovbituinjr.

03.12.2022

Pinaghalawan ng datos:

https://nwpc.dole.gov.ph/?s=provincial+minimum+wage

https://nwpc.dole.gov.ph/regionandwages/national-capital-region/

https://allthebestloans.com/blog/minimum-wage-in-the-philippines

Hustisya sa Klima, Ngayon Na!

HUSTISYA SA KLIMA, NGAYON NA

dinig ko ang talumpati ni David D'Angelo

talagang mapapaisip ka kapag ninamnam mo

lalo't sinabi ang pag-iinit ng klima, mundo

na sa loob ng walong taon, lalala pa ito

habol natin, huwag umabot ng 1.5 degree

ang pag-iinit ng mundo, ngunit kanyang snabi

doon sa nilahukang rali, ito pa'y titindi

baka sa walong taon, abot na'y dalawang degri

nakababahala ang nangyayari sa daigdig

habang ang bansang Ukraine ay pilit na nilulupig

dahil daw sa fossil fuel, gerang nakanginginig

sa nangyayaring climate change pa'y anong dapat tindig

si D'Angelo, sa Senado'y kandidato natin

sa kanyang talumpati ay sinabi nang mariin

pagsusunog ng fossil fuel ay dapat pigilin

pagpapatakbo ng coal plants ay dapat sawatain

subalit mga iyon ay pagbabakasakali

makapangyarihang bansa'y gagawin ang mungkahi?

malaking katanungan, di iyon gayon kadali

dapat ngang mag-organisa para sa ating mithi

dapat Annex 1 countries ay pagbayarang totoo

ang nangyayari sa lahat ng bansang apektado

karaniwang mamamayan ay kumilos ding todo

upang mapigilan na ang nagaganap na ito

asam nating itayo ang makataong lipunan

na walang sinusunog na fossil fuel o coal plants

kung saan pantay, walang mahirap, walang mayaman

may karapatang pantao't hustisyang panlipunan

- gregoriovbituinjr.

03.11.2022

* litratong kuha ng makatang gala noong Women's Day

Ang planong aklat na "101 RED POETRY para kina Ka Leody, Walden at sa kanilang line-up"

ANG PLANONG AKLAT NA "101 RED POETRY PARA KINA KA LEODY, WALDEN AT SA KANILANG LINE-UP"

Maikling sanaysay ni Gregorio V. Bituin Jr.

Isang pambihirang pagkakataon ang ibinigay ng kasaysayan kina Ka Leody De Guzman na tumatakbong pangulo ng bansa, Propesor Walden Bello para sa pagkabise-presidente, Atty. Luke Espiritu, Roy Cabonegro at David D'Angelo bilang mga senador, at sa ating PLM (Partido Lakas ng Masa) partylist.

Pambihirang pagkakataon din ito upang muling maging aktibo ang inyong lingkod na kumatha ng tula at payabungin ang tinatawag na panitikang proletaryo o panitikan ng uring manggagawa. Ika nga noon ng guro kong si Rio Alma sa aking mga tula ay pulos daw social realism. Ibig sabihin, pagkatha ng tula batay sa reyalidad ng nangyayari sa lipunan. Ibig sabihin din, kaiba sa kanilang panukalang Modernismo sa pagtula.

Pambihirang pagkakataon din ito sa tulad kong makatang maglulupa na makapaglathala ng aklat na "101 RED POETRY para kina Ka Leody at Walden at sa kanilang line-up" lalo na't naunang naglabas ng aklat na "100 Pink Poems para kay Leni" ang animnapu't pitong (67) kilalang makata sa bansa, sa pangunguna ng makatang Rio Alma, na pambansang alagad ng sining o National Artist sa ating bansa.

Subalit ang inilalabas nating aklat na "101 Red Poetry..." ay hindi bunsod ng inggit dahil nakapaglabas sila ng mga tula para kay Leni Robredo na ikinakampanya nilang pangulo. Hindi lang ito bunsod na dapat kong ikampanya ang aking ninong sa kasal na si Ka Leody De Guzman bilang pangulo, at ang buo niyang line-up. Higit sa lahat, ito'y bunsod ng tungkulin ko bilang makata na gisingin, ibangon, at payabungin pa ang tila naghihingalong panitikang proletaryo sa bansa. 

Ito'y bunsod din ng tungkulin ko bilang makatang aktibista na ipaunawa ang tunggalian ng uri sa masang Pilipino laban sa mga tula ng mga elitistang nasa toreng garing. Ito'y panitikan mula sa ibaba, mula sa putikan ng iskwater, mula sa pagawaan ng mga unyonistang nakawelga, mula sa kababaihang nakikibaka, mula sa mga maralitang dinedemolis ang kanilang mga tahanan, mula sa kabataang nais ng mas maayos at dekalidad na edukasyon, mula sa mga magsasakang nagpapakain sa buong lipunan subalit nananatiling mahirap, mula sa mga vendor na nagsisikap maghanapbuhay ng marangal subalit pinagbabawalang magtinda, na madalas ay hinuhuli ng mga pulis o nakikipaghabulan pa sa mga taong gobyerno, mula sa mga inosenteng taong biktima ng extrajudicial killings sa bansa, mula sa piitan ng mga bilanggong pulitikal, mula sa panawagang karapatang pantao at hustisyang panlipunan. Ah, napakaraming api at pinagsasamantalahan sa lipunan, at kulang ang 101 tula upang ilarawan, ikwento at itula lahat sila.

Working-in-progress pa ang mga kathang tulang ito na sinimulan lamang noong Marso 1, 2022, at balak matapos at malathala na sa mismong Mayo 1, 2022, Pandaigdigang Araw ng Manggagawa. At dahil nais nating maabot ang gayong bilang ay aktibo tayong tula ng tula sa bawat araw. Kaya noong Marso 1, 2022 ay nalikha na ang facebook page na 101 Red Poetry for Ka Leody and Walden, bagamat Ingles ay nasa wikang Filipino ang mga tula.

Subalit bakit 101 imbes na 100, tulad ng libro ng mga makata para kay Leni? Una, dahil bihira sa mga manunulang kabilang sa 101 ang talagang tumutula. Marahil ako lamang. Nakapagpasa sa akin si Ka Tek Orfilla, Bise Presidente ng Kongreso ng Pagkakaisa ng Maralitang Lungsod (KPML), kung saan ako ang sekretaryo heneral, ng dalawang pahinang may labing-isang (11) tula hinggil sa pagtakbo nina Ka Leody, na nais kong isama sa 101. Ikalawa, ang 101 ay kadalasang inilalakip sa mga subject sa kolehiyo bilang pundamental o pangunahing pag-aaral hinggil sa isang paksa. Halimbawa, Rizal 101, Human Rights 101, Sociology 101, at iba pa. Ibig sabihin, para sa mga bagito pa sa kolehiyo, o bagito pa sa paksang iyon. Tulad ng ilang kilala kong aktibista't maralita na bihirang sumusulat ng tula datapwat paminsan-minsan ay nakakapagsulat ng tula.

Subalit bakit Red Poetry? Dahil ba Pink Poems ang inilathala para kay Leni? Marahil nga, labanan din ito ng mga kulay. Kulay pula bilang tindig ng mga manggagawa. Kulay pula dahil pag lumabas ang mga manggagawa at lumahok sa pagkilos tuwing Mayo Uno, lahat sila o mayorya sa kanila ang nakapula. Ang pula ay kulay ng kagitingan, kulay ng pakikibaka ng ating mga bayani. Kulay ng katapangan na kahit masugatan ay hindi susuko. Kulay ng manggagawa. Ang pink ay malabnaw na pula o may halong dilaw kaya lumabnaw.

Kaya ang paglalathala ng 101 Red Poetry ay isang pagkakataon upang ilathala ang tula ng mga nasa ibaba, mga marginalized o sagigilid o nasa laylayan ng lipunan. Kung nais mong makibahagi sa proyektong ito, inaanyayahan kitang ilathala mo sa iyong fb account ang iyong tula, at kung mamarapatin mo, at bilang editor ng page at ng lalabas na aklat, ay karapatan kong ilathala iyon kung naaayon at di mapanira sa ating mga kandidato. 

Ang maglalathala ng aklat ay ang Aklatang Obrero Publishing Collective na aking pinamamahalaan simula pa noong taon 2007. Nakapaglathala na ito ng maraming aklat ng tula, at mga aklat ng kasaysayan hinggil kina Macario Sakay, Andres Bonifacio, Emilio Jacinto, Che Guevara, Ka Popoy Lagman, at Lean Alejandro. Ang disenyo ng pabalat ng aklat sa sanaysay na ito ay draft o borador pa lamang. Maaari pa itong mapaunlad. Subalit gustong-gusto ko ang litrato ng dyip na may poster nina Ka Leody, dahil sumisimbolo ito ng karaniwang taong ipinaglalaban nina Ka Leody, Ka Walden at ng kanilang line-up.

May plano rin tayong tulaan ng Red Poetry o Pulang Tula sa mga sumusunod na araw: Marso 21 - World Poetry Day; Abril 2 - Balagtas Day, na magandang ilunsad sa plasa kung saan may rebulto ang makatang Francisco Balagtas sa Pandacan, Maynila; at sa hapon o gabi ng Mayo Uno 2022 matapos ang rali ng mga manggagawa.

Tara, magtulaan na tayo, at magpasa na kayo ng tula para sa 101 Red Poetry para kina Ka Leody, Walden, at sa kanilang line-up.

Sinulat sa opisina ng manggagawa sa Lungsod ng Pasig

Marso 11, 2022

Panawagan ng kilusang ORIANG

PANAWAGAN NG KILUSANG ORIANG

"Ipanalo ang paglaya ng kababaihan!"

at "Sagipin ang bayan mula sa kahirapan!"

dinggin ang mariing hiyaw ng kilusang ORIANG

at damhin ang katapatan ng paninindigan

silang mga babae'y di dapat binabastos

Safety Spaces Act, VAWC Act, alaming lubos

di dapat mga buhay nila'y kalunos-lunos

dahil sa hirap na dulot ng pambubusabos

sinumang babae'y larawan ng ating ina

lalo't tayo'y mula sa sinapupunan nila

ika nga, kung kaya ng lalaki, kaya nila

ngunit kanilang sweldo'y di patas sa pabrika

double burden, dobleng pasanin ang maririnig

sa mga babaeng tila nawalan ng tinig

paano lalaya, dinggin ang kanilang tindig

unawain silang kalahati ng daigdig

ang panawagan ng Oriang ay dapat malirip

paano bang bayan sa kahirapan masagip

ang paninindigan nila'y walang kahulilip

kundi paglaya nilang sa puso halukipkip

- gregoriovbituinjr.

03.11.2022

* litratong kuha ng makatang gala noong Women's Day

Salot na kontraktwalisasyon ay iskemang linta

SALOT NA KONTRAKTWALISASYON AY ISKEMANG LINTA

tunay na salot sa manggagawa

ang kontraktwalisasyong malubha

walang seguridad sa paggawa

benepisyo ng obrero'y wala

kontrata'y apat o limang buwan

di paabuting anim na buwan

sa kapitalista nga'y paraang

di maregular sa pagawaan

kontraktwalisasyon ay iskemang

inimbento ng kapitalista

manpower agencies, likha nila

upang magsamantala talaga

upang karapatan sa paggawa

ay maikutan nila't madaya

iskema itong kasumpa-sumpa

para sa tubo, iskemang linta

dugo't pawis ng obrero'y dilig

sa pagawaan, sakal sa leeg

obrero, kayo'y magkapitbisig

upang iskemang ito'y malupig

laway lang ang puhunan, pera na

manpower agencies ay kaysaya

walang gawa, bundat pa ang bulsa

lintang tunay sa sahod ng masa

durugin ang kontraktwalisasyon

wasakin na ang salot na iyon

sa manggagawa, ito ang misyon

kung nais na sila'y makaahon

kaya manggagawang kandidato

natin sa halalan ay iboto

pag sila'y ating naipanalo

salot ay bubuwaging totoo

- gregoriovbituinjr.

03.10.2022        

Kuyom ang kaliwang kamao

KUYOM ANG KALIWANG KAMAO

tingnan mo't kuyom ang kanilang kaliwang kamao

tandang patuloy nilang pinaglalabang totoo

ang panlipunang hustisya't karapatang pantao

itama ang mga mali, iwasto ang proseso

kaliwang kamao para sa obrero't hustisya

di sila makakanang kampi sa trapo't burgesya

sila'y mga karaniwang taong lingkod ng masa

may simpleng pamumuhay, puspusang nakikibaka

kuyom ang kaliwang kamao, tapat manindigan

upang karapatang pantao'y talagang igalang

pawang matatalas magsuri sa isyung pambayan

para sa kagalingan ng mayoryang mamamayan

sa darating na halalan, may prinsipyo'y iboto

tandaan sina Leody de Guzman, Walden Bello

para sa pagkapangulo't ikalawang pangulo

senador: Espiritu, Cabonegro, D'Angelo

halina't magbigkis, kaliwang kamao'y itaas

upang durugin ang mapagsamantala't marahas

ito'y tanda ng katatagan at pagkapangahas

upang itayo ang pangarap na lipunang patas

upang itatag ang pangarap na magandang bukas

- gregoriovbituinjr.

03.09.2022

Si David D'Angelo noong Women's Day

SI DAVID D'ANGELO NOONG WOMEN'S DAY

makakalikasang pambato natin sa Senado

sa Araw ng Kababaihan kasamang dumalo

nagtalumpati sa Oriang si David D'Angelo

sa isyu ng klima'y nagpaliwanag pang totoo

sigaw niya: Mabuhay ang mga kababaihan!

binanggit ang magiting na si Gabriela Silang

nabanggit din si Bonifacio ngunit di si Oriang

tila di kilala, Lakambini ng Katipunan

gayunman, talumpati niya sa klima'y matindi

pag-init ng mundo'y baka umabot ng two degree

sa loob ng walong taon, na pag ito'y nangyari

pagtaas ng tubig-alat, tayo'y magiging saksi

nakadaupangpalad sa unang pagkakataon

kaya sa kanya ako'y nag-selfie rin naman doon

si David D'Angelo, senador nating may misyon

ating ipanalo sa Senado, magandang layon

- gregoriovbituinjr.

03.09.2022

* litratong kuha ng makatang gala sa nilahukang rali, Marso 8, 2022

Tayo Naman

TAYO NAMAN

"Pulitika ng mamamayan, hindi ng iilan!"

prinsipyadong adhikaing tangan ng mamamayan

"Bagong Botante, Bagong Pulitika! Tayo Naman!"

panawagang may buong tapat na paninindigan

wakasan ang PULITIKANG BUNTOT sa mga trapo

kung saan sasayaw lang sila'y agad mananalo

pati dinastiyang pulitikal, wakasan ito

serbisyong bayan ay di na dapat maging negosyo

wakasan ang lipas nang panahon ng paghahari

nitong trapo, elitista, burgesya, hari't pari

bulok na sistema nila'y di dapat manatili

uring manggagawa naman ang ating ipagwagi

"Manggagawa Naman!", "Tayo Naman" yaong mamuno

sa ating bansang ang hustisya'y dinilig ng dugo

sa tunggalian ng uri ay di tayo susuko!

tayo'y prinsipyado, basagin man ang ating bungo!

- gregoriovbituinjr.

03.09.2022

* litratong kuha ng makatang gala sa dinaluhang rali noong Women's Day

#123 PLM partylist tayo

#123 PLM PARTYLIST TAYO

numero Uno, Dos, Tres, P.L.M. partylist tayo

atin silang iboto at iupo sa Kongreso

upang may representasyon ang karaniwang tao

na babangga sa tinig ng gahama't bilyonaryo

pagkakapantay sa lipunan ang adhika nila

karapatan nati'y mapangalagaan talaga

dedebatihan ang mga hunyangong kongresista

na kunwa'y pangmasa, makakapitalista pala

bakit laksa'y mahirap, bakit may ilang mayaman

pribadong pag-aari nga'y ugat ng kahirapan

kaya sistemang bulok, yayanigin, papalitan

bagong pulitika't ekonomya ang kailangan

Partido Lakas ng Masa, na ang inaadhika

na sa yaman ng lipunan, makinabang ang madla

kaginhawahan ang asam para sa walang-wala

at kabulukan ng sistema'y babaguhing sadya

kaya P.L.M. partylist ay ikampanya natin

at ipanalo, sa Kongreso'y kayraming gagawin

pati si Ka Leody de Guzman, pangulo natin

na dapat ipagwagi, ito'y misyon at hangarin

- gregoriovbituinjr.

03.08.2022

Si Ka Leody sa Rali ng Kababaihan

SI KA LEODY SA RALI NG KABABAIHAN

maalab ang talumpati ng lider-manggagawa

sa rali ng kababaihan, kung pakinggan mo nga

talagang sa sistemang bulok nais makawala

nang lipunang makatao'y maitayo ngang sadya

O, kababaihan, ang sabi ng lider-obrero

"Sa sama-samang pagkilos, magtatagumpay tayo!"

sa kanyang tinuran ay palakpakang masigabo

dama mo ang tapat na paninindigan, totoo

para pangulo ng bansa, Ka Leody de Guzman

para sa manggagawa, para sa kababaihan

nais na pagsasamantala'y mawalang tuluyan

at bawat buhay ng tao'y bigyang kahalagahan

adhikain niya'y talagang pagbabagong tunay

walang pang-aapi, isang lipunang pantay-pantay

ang kababaihan ay kaisa sa bawat pakay

makataong lipunan ang layunin niyang lantay

kababaihan sa lipunan ay di dapat api

o pagsamantalahan ng sistema ang babae

dapat babae'y nirerespeto, kanya pang sabi

bulok na sistema'y wakasan, talagang iwaksi

- gregoriovbituinjr.

03.08.2022

Sa Rali ng Kababaihan

SA RALI NG KABABAIHAN

naroon silang kandidatong lumahok sa rali

ng grupong Oriang, silang sa bayan na'y nagsisilbi

nagtalumpati't pinagtanggol ang mga babae

mula sa karahasan ng mga trapo't buwitre

unang nagtalumpati ay si Tita Flor ng Oriang

at sumunod ang ating pambato sa panguluhan

ang lider-manggagawang si Ka Leody de Guzman

sunod si Walden, Ka Luke, David D'Angelo naman

Pandaigdigang Araw ng Kababaihan ngayon

at plataporma nila'y inilatag nila roon

nagtalumpating may galit man ngunit mahinahon

dahil inupakan yaong katunggali't si Gadon

na bastos sa kababaihan, dahil walang modo

may-akdang si Raisa Robles ay binastos umano

habang divorce bill ay nilatag ni Ka Walden Bello

at hinggil sa kalikasan kay David D'Angelo

mga plataporma iyong patungo sa paglaya

ng kababaihan sa bulok na sistema't sigwa

karapatan, climate justice, kayraming isyu't paksa

na kanilang tangan upang ipagtanggol ang madla

ipagtanggol laban sa tuso, buwitre't gahaman

upang mga kababaihan ay maprotektahan

Mabuhay ang Oriang! Mabuhay ang kababaihan!

Mabuhay silang kandidato natin! Tayo Naman!

- gregoriovbituinjr.

03.08.2022

* litratong kuha ng makatang gala sa dinaluhang rali