Bagong proklamasyon, hiniling ng mga taga-Lupang Arenda

BAGONG PROKLAMASYON, HINILING NG MGA TAGA-LUPANG ARENDA

Hunyo 27, 2014 - Nagsagawa ng pagkilos ang mga taga-Lupang Arenda, Brgy. Sta. Ana, Taytay, Rizal, sa paanan ng Mendiola upang hilingin kay PNoy na ibigay na ang ipinangako umano nitong proklamasyon upang maging ganap na pag-aari ng mga maralitang nakatira sa Lupang Arenda ang nasabing lugar.

Matatandaang noong Nobyembre 1995, sa pamamagitan ng Proklamasyong 704 ni dating Pangulong Fidel Ramos, ibinigay sa mga maralita ang Lupang Arenda. Ngunit noong panahon naman ni Gloria Macapagal Arroyo, matapos maganap ang bagyong Ondoy, tinanggal ang Proklamasyong 704 sa pamamagitan ng Executive Order (EO 854) ni GMA. Noong Eleksyon 2010, isa sa nilalaman ng covenant ni PNoy sa mga maralita ang pagtiyak na muling maibalik sa mga taga-Lupang Arenda ang karapatan sa paninirahan sa lugar.

Si Vicente "Enteng" Barlos, na siyang pangulo ng Arenda Urban Poor Federation, Inc. (AUPFI), kasama ang ilang lider, ay nagtungo sa loob ng Malakanyang habang nagrali naman sa bandang kanang bahagi ng Mendiola ang kanilang mga kasapian. Pagbalik ni Barlos at ng kanyang mga kasamahan ay agad siyang nag-ulat sa kanilang kasapian.

Kasabay nilang nagrali ang grupong KPML (Kongreso ng Pagkakaisa ng mga Maralita ng Lungsod), na nasaa kabilang bahagi naman ng Mendiola, at nananawagan naman ng price control, dahil na rin sa pagsirit ng presyo ng pangunahing mga bilihin, tulad ng bawang na nasa P400 na kada kilo, mula sa P60-P70 kada kilo noong nakaraang buwan.

Ulat at mga litrato ni Greg Bituin Jr.

Koalisyong Pabahay ng Pilipinas (KPP), sumama sa pagkilos laban sa pork barrel

KOALISYONG PABAHAY NG PILIPINAS (KPP), SUMAMA SA PAGKILOS LABAN SA PORK BARREL

Isa ang Koalisyong Pabahay ng Pilipinas (KPP) sa nagtungo sa Bonifacio Shrine sa Mehan Garden sa Maynila nitong Hunyo 12, 2014. Ang kanilang pagsama ay bilang pakikiisa sa panawagang "Jail All" - o ikulong lahat ng mga sangkot sa pork barrel scam, sila man ay oposisyon o maka-administrasyon.

Kasama nila ang mga grupong Bukluran ng Manggagawang Pilipino (BMP), Sanlakas, Kongreso ng Pagkakaisa ng mga Maralita ng Lungsod (KPML), Partido Lakas ng Masa (PLM), Alliance for Truth, Integrity and Nationalism (ATIN), Zone One Tondo Organization (ZOTO), Aniban ng Manggagawa sa Agrikultura (AMA), Pagkakaisa ng Manggagawa sa Transportasyon (PMT), Piglas-Kabataan (PK), SUPER-Federation, Makabayan-Pilipinas, Ang Grupo ng Organisadong Mamamayan (AGOM), at Proletaryong Rebolusyonaryong Kilusan (PRK).

Nakasama nila sa Bonifacio Shrine ang mga grupong Kilusang KontraPork, Workers Alliance Against Corruption (WAAC), NAGKAISA, Freedom from Debt Coalition (FDC), Water for All Refund Movement (WARM), APL-SENTRO, Partido ng Manggagawa (PM), at marami pang iba. Ang estimasyon ay mga nasa humigit-kumulang sa apatnalibo ang lumahok sa makasaysayang pagkilos na ito.

Ulat at mga litrato ni Greg Bituin Jr.

"JAIL ALL! Ikulong Lahat!" - BMP, PLM, SANLAKAS, KPML, at ATIN

"JAIL ALL! Ikulong Lahat!" - BMP, PLM, SANLAKAS, KPML, at ATIN

"JAIL ALL! IKULONG LAHAT!" Ito ang nagkakaisang panawagan sa naganap na kilos-protesta nitong Hunyo 6, 2014 sa People Power Monument sa Edsa. Ang nasabing pagkilos ay pinangunahan ng Alliance for Truth, Integrity and Nationalism (ATIN), Bukluran ng Manggagawang Pilipino (BMP), Partido Lakas ng Masa (PLM), SANLAKAS, at Kongreso ng Pagkakaisa ng mga Maralita ng Lungsod (KPML). Kaugnay ito ng isyung pork barrel na sumingaw na umano'y ninanakaw ng mga kawatan sa gobyerno. Ipinanawagan ng nasabing mga grupo na dapat lahat ng may kasalanan o kasama sa mga naakusahang nagnakaw ng pondo ng bayan ay dapat ikulong lahat, maging mayaman man o mahirap.

Sabi nga ng tagapagsalita ng PLM na si Emma Garcia, nabalita sa radyo't telebisyon ang nagnakaw ng isang kilong tuyo na pinahirapan pa ng mga awtoridad, binugbog at kinulong upang pagdusahan ang pagnanakaw ng isang kilong tuyo. Dagdag pa roon ang pagpapahiya sa kanyang pagkatao. Yaon pang mga nagnakaw ng bilyon-bilyon sa taumbayan ay hindi maikulong. Dapat mas matindi pa sa sinapit ng nagnakaw ng isang kilong tuyo ang sapitin ng mga nagnakaw ng bilyon-bilyong pondo ng taumbayan.

Tinalakay naman ni Rasti Delizo ng  Sanlakas ang iba pang aktibidad kaugnay nito. May kilos-protesta sa Hunyo 8 sa iba't ibang panig ng Metro Manila; Hunyo 10 sa Korte Suprema, at ang malaking rali sa Hunyo 12 sa Kartilya ng Katipunan Shrine, na nasa likod ng Mehan Garden sa Maynila. Lahat ng ito'y nananawagan laban sa katiwalian sa pamahalaan, at ikulong lahat ng may kasalanan sa pagnanakaw ng pondo ng bayan, partikular ang pork barrel.

Sinabi naman ni Ka Pedring Fadrigon, pambansang pangulo ng KPML, patuloy na maghihirap ang taumbayan hangga't naririyan ang sistemang pork barrel at ang mga kawatan sa gobyerno. Ayon naman kay Ka Leody de Guzman, pangulo ng BMP, dapat managot ang mga may kasalanan sa taumbayan, at dapat ikulong lahat ng mga kawatan.

Nagsimula ang kilos-protesta bandang ikasampu ng umaga at natapos ng ikalabindalawa ng tanghali.

Ulat at mga litrato ni Greg Bituin Jr.