November 23, 2012
Kilusang Kontra Buwis-it
Hiling na “Maagang Pamasko” ng Maralita at Manggagawa:
Huwag ipasa ang Bagong Buwis sa Mahihirap,
Pagpapagaan sa Kahirapan, ‘di Bagong Pasanin
NAGLUNSAD ng press-conference ang Kongreso ng Pagkakaisa ng Maralitang Lungsod (KPML) bukas para ilunsad ang KKB o Koalisyon Kontra Buwis-it. Layon ng koalisyon na labanan ang mga buwis na pasan ng mahihirap.
Ayon kay Pedring Fadrigon, pambansang tagapangulo ng KPML, “Hindi kami tutol sa buwis. Alam naming obligasyon ng mamamayan ang magbayad ng buwis para tustusan ang mga programa ng pamahalaan. Pero ang mas dapat pumasan ng pagbubuwis ay ang mga may-kaya hindi ang mahihirap. Those who have more in life should have more of the tax burden”.
“Ang tinututulan namin ay ang mga buwis-it – ang klase ng mga buwis na nakakarga sa presyo ng mga batayang pangangailangan. Mga klase ng buwis na nakabatay sa konsumo imbes na sa kita at pag-aari,” dagdag ni Fadrigon.
Paliwanag ni Leody de Guzman, pambansang tagapangulo ng Bukluran ng Manggagawang Pilipino at co-convenor ng Kilusang Kontra Buwis-it, “Ang sahod may withholding tax. Ang overtime pay may tax. Ang iba’t ibang mga bonus ay may tax. Ang tubig, may VAT. Ang kuryente, may VAT. Ang pagkain at damit, may VAT. Ang langis at produktong petrolyo, may VAT. Ang paggamit ng kalsada may road users’ tax. Binatbat na kami ng sobrang pagbubuwis. ‘Di tulad ng mga negosyanteng – bukod sa may panuhol sa kolektor ng BIR – ay may mga akawntant at mga abogado para makaiwas sa pagbubuwis”.
Ani de Guzman, “Ngayong umaalingawngaw ang mga kontrobersya ukol sa gold tax, sa sin tax at sa text tax, iisa lamang ang reaksyon ng mga mahihirap: “Kami na naman?!” Bakit ang mahihirap ang mas pumapasan ng mga buwis? Ang pondo ng gobyerno ay kinukurakot lang ng iilang opisyal sa pamahalaan at hindi napupunta sa taumbayan! Bakit ang manggagawa’t maralita ang bubuhay sa estado ng mga asendero’t kapitalista? Hindi naman sa masa nagsisilbi ang gobyernong binubuo ng mga elitista!”
Hiniling din ng Kilusang Kontra Buwis-it sa gobyernong Aquino na “bigyan ng maagang pamasko” ang mga mahihirap sa pamamagitan ng “pagtigil sa bagong buwis” at “gawing urgent ang pagrereporma sa sistema ng pagbubuwis” para pagainin ang kahirapang dinaranas ng milyon-milyong Pilipino. Sa naturang press conference, nagsuot ng “Christmas hats” ang mga maralita at nangaroling ng “O Buwis na naman” (sa saliw ng “Pasko na Naman”), gamit ang mga kalderong walang laman bilang tambol. #
O Buwis na Naman!
(to the tune of “Pasko Nanaman”)
O Buwis na naman
O kay tulin ng araw
Ang Twelve Percent VAT
Tila ba kung kailan lang
Ngayon bagong buwis
Para sa Taumbayan
Ngayon bagong buwis
Sa Walang Laman ang Tiyan
KORO:
O buwis, O buwis
O buwis na namang muli
IMF World Bank lang
Ang napapangiti
O buwis, O buwis
O buwis na namang muli
Ang bangkero naghahari
Walang komento:
Mag-post ng isang Komento